«Интер» устидан қозонилган муҳим ғалабадан сўнг Клаудио Раньери нималар деди?

Италия А Сериясининг 34-турида «Рома» ўз майдонида «Интер» клубини мағлуб этди. Мазкур учрашувдаги муҳим ғалаба ортидан жамоа бош мураббийи Клаудио Раньери ўзининг таассуротлари билан ўртоқлашди.

«Аввало, бугунги муҳим ғалабани стадионга кела олмаган, аммо юракдан биз билан бирга бўлган мухлисларимизга бағишлаймиз. Учрашувнинг биринчи ярим соатида биз ажойиб ўйин намойиш этдик ва рақибга деярли имконият қолдирмадик. Аммо «Интер» жуда кучли таркибга эга клуб. Уларга қарши беллашув ҳеч қачон осон бўлмайди. Шунинг учун ҳам бу ғалабамиз жуда қимматли ва аҳамиятлидир», – деди Раньери.

Италиялик мураббийнинг таъкидлашича, «Рома» жорий мавсум давомида ҳали А Сериянинг кучли ва йирик жамоаларига қарши муваффақият қозона олмаганди. Бу натижа жамоага қўшимча ишонч бағишлайди.

«Ҳақиқатан ҳам, бу мавсумда биз катта клубларнинг бирортасини мағлуб эта олмагандик. Бу омадсиз серияни айнан «Интер» каби кучли рақибга қарши ўйинда тўхтатиш биз учун икки ҳисса ёқимли бўлди. Энг асосийси, футболчиларим бугунги учрашувда ажойиб жамоавий ўйин кўрсатиб, мухлислар ишончини оқлашди», – дея ўз фикрларини қўшимча қилди мутахассис.

Шунингдек, Клаудио Раньери жамоанинг кейинги рақиби – «Фиорентина» ҳақида ҳам тўхталиб ўтди.

«Бу ғалаба билан чекланиб қолмаслигимиз керак. Олдинда яна бир жиддий рақиб – «Фиорентина» клуби бор. Улар ҳам Италия футболида ўзининг ўрнига эга бўлган буюк жамоа. Энди бор кучимиз билан кейинги беллашувларга тайёргарлик кўришда давом этамиз. Футболчиларнинг кайфияти юқори ва биз ҳар бир учрашувда ғалаба учун майдонга тушамиз», – деб сўзларини якунлади Клаудио Раньери. «Замин»ни Telegram’да ўқинг!