Қатар миллий жамоасини машҳур испаниялик мутахассис бошқарадиган бўлди

Испания миллий терма жамоаси ва Мадриднинг "Реал" клубининг собиқ бош мураббийи Хулен Лопетеги расман Қатар миллий терма жамоасининг бош мураббийи сифатида тайинланди. Бу ҳақда бир қатор хорижий нашрлар ва экспертлар, жумладан, таниқли журналист Фабрицио Романо ҳам хабар тарқатди.

Маълумки, Хулен Лопетеги ўзининг мураббийлик фаолияти давомида кўплаб нуфузли клубларда фаолият олиб борган. У Испания миллий терма жамоасидан ташқари, Португалиянинг "Порту", Испаниянинг "Реал Мадрид" ва "Севилья" клубларини ҳам бошқарган. Лопетеги охирги марта Англиянинг "Вест Хэм" жамоасида ишлаб, жорий йил январь ойида ўз лавозимини тарк этган эди.

Ҳозирги пайтда Қатар терма жамоаси 2026 йилда бўлиб ўтадиган футбол бўйича жаҳон чемпионати саралаш баҳсларида иштирок этиб келмоқда. Қатарликлар саралаш босқичининг 8-туридан кейин ўз ҳисобларига 10 очко ёзиб қўйган ва гуруҳда 4-поғонани эгаллаб туришибди.

Қатар терма жамоасини олдинда муҳим икки учрашув кутиб турибди. Улар саралашнинг навбатдаги ўйинларида Эрон ҳамда Ўзбекистон миллий жамоаларига қарши баҳс олиб боришади. Хулен Лопетеги Қатар жамоаси бошқарувига келиши билан терма жамоа натижаларини яхшилаш ва жаҳон чемпионатига йўлланма олиш мақсадида жиддий тайёргарликни бошлаши кутилмоқда.

Мутахассислар Қатар футбол федерациясининг бу қарорини мамлакат футболи тараққиёти учун муҳим қадам сифатида баҳоламоқда. Лопетегининг бой тажрибаси ва юқори профессионаллиги Қатар миллий жамоасининг ўйинини кучайтириш ва халқаро майдондаги нуфузини оширишда муҳим омил бўлиши мумкин.

Эслатиб ўтамиз, Ўзбекистон миллий терма жамоаси 10 июнь куни Тошкентда айнан Лопетеги бошқарувидаги Қатар термасига қарши майдонга тушади. Бу ўйин саралаш босқичидаги вазият учун ҳал қилувчи аҳамият касб этиши мумкинлиги айтилмоқда. «Замин»ни Telegram’да ўқинг!