Ламин Ямал Месси ва Роналдунинг ёшлик рекордларини ортда қолдирди!

"Барселона"нинг 17 ёшли иқтидорли вингери Ламин Ямал профессионал фаолиятидаги юбилей – 100-ўйинини Чемпионлар лигаси ярим финали доирасида "Интер"га қарши (3:3) баҳсда ўтказди. Испаниялик ёш истеъдод ушбу муҳим ўйинда ўз ҳиссасини қўшиб, рақиб дарвозасига бир бор гол киритишни уддалади.

Британиянинг машҳур Sky Sports нашри ушбу ёш вундеркинднинг профессионал карьераси бошланишига оид кўрсаткичларини футбол оламининг икки буюк афсонаси – Криштиану Роналду ва Лионел Месси билан солиштириб чиқди.

Нашр маълумотларига кўра, Ямал ўзининг 17 ёшигача профессионал даражадаги 100 та учрашувда 22 маротаба рақиб дарвозаларини ишғол қилган ва жамоадошларига 33 марта голли узатма берган. Бу эса ушбу ёшдаги ўйинчи учун феноменал натижадир.

Масалан, португалиялик юлдуз Криштиану Роналду 17 ёшида катталар футболининг юқори савиядаги 19 та ўйинида майдонга тушиб, бор-йўғи 5 та гол ва 4 та ассист билан чекланган эди.

"Барселона"нинг афсонавий футболчиси Лионел Месси эса шу ёшида атиги 9 та ўйинда иштирок этиб, фақатгина 1 та гол урган холос.

Бундай кўрсаткичлар билан Ламин Ямал ҳозирданоқ жаҳон футболи афсоналари эришган рекордларни янгилашга тайёр истеъдод сифатида кўрилмоқда. Унинг бундай ёшлигида катта футболда эришаётган ютуқлари нафақат "Барселона" мухлисларини, балки бутун футбол жамоатчилигини лол қолдирмоқда.

Айни дамда мухлислар ва экспертлар Ламин Ямалнинг келгуси фаолиятини катта қизиқиш билан кузатмоқда. Унинг бундай жадал ўсиши жаҳон футболида яна бир янги юлдуз пайдо бўлишидан дарак бермоқда. «Замин»ни Telegram’да ўқинг!