“Манчестер Сити”да навбатдаги тозалаш: Гвардиола кетадиган марказий ҳимоячи номини айтди

Англия Премьер-лигасида мавсум якунига бор-йўғи учта тур қолар экан, “Манчестер Сити” Европа Чемпионлар лигаси йўлланмасига жуда яқин турибди. Ҳар қанчаки жамоа ушбу мавсумда чемпионликни “Ливерпуль”га бой берган бўлса-да, Хосеп Гвардиола мураббий сифатида жамоасини қийин даврдан олиб чиқишга муваффақ бўлди.

Инқироздан кейин — янгиланиш сиёсати

Мавсумнинг дастлабки қисмида кузатилган инқироз ва кўплаб жароҳатлар туфайли “шаҳарликлар”нинг асосий ўйин тизимида узилишлар юз берди. Испаниялик мутахассис эса ечимни таркибни тозалаш ва ёшартиришда кўрди.

Январдаёқ жамоа сафини Абдуқодир Ҳусанов, Витор Рейс, Нико Гонсалес ва Умар Мармуш каби иқтидорли, ёш футболчилар билан тўлдириш бошланди.

Кетувчилар рўйхати шаклланяпти

Гвардиола энди жамоадаги айрим таниқли, лекин натижага кам таъсир кўрсатаётган футболчилар билан хайрлашишга тайёргарлик кўрмоқда. Бу рўйхатда энг кўзга ташланадиган исм — Жон Стоунз.

Стоунзнинг тарихий ўрни ва кечаги камайган роли

30 ёшли ҳимоячи 2016 йилда “Эвертон”дан олиб келинган ва узоқ йиллар давомида “Сити”нинг марказий ҳимоясида асосий фигура сифатида ҳаракат қилган. Уни фақат марказда эмас, балки ҳимоянинг турли нуқталарида кўриш мумкин эди.

Аммо бу мавсумда Стоунз 20та ўйиндагина майдонга туша олди. Турли жароҳатлар, спорт формасининг пастлиги ва янги рақобатчилар унинг мавқеини сўндирди.

Гвардиола: тажриба эмас, жисмоний тайёргарлик муҳимроқ

Хосеп Гвардиола бу қарор орқали жамоанинг янги босқичга ўтаётганини кўрсатмоқда. Энди жамоада биринчи навбатда ёш, бақувват, тезкор ва жанговар футболчиларга эътибор қаратилади. Бу эса Стоунз каби катта маош оладиган, лекин майдонда етарлича самара кўрсатмаётган футболчилар учун хатарли сигнал.

Спорт директор — янги сиёсат юзининг рамзи

Клуб бу янгиланиш жараёнини тўлиқ ва тизимли ташкил этиш учун спорт директори сифатида Уго Вианани таклиф этди. У ёзги трансферлар орқали янги жамоа асосини шакллантиришга масъул қилиб тайинланди.

Стоунзга таклифлар етарлича, аммо...

Жон Стоунзнинг эркин агент эмаслиги (унинг “Сити” билан яна бир йиллик шартномаси бор) унинг кетишини қийинлаштирса-да, унга бўлган қизиқиш юқори. Собиқ клуби “Эвертон” футболчини ортга қайтариш истагида. “Вест Хэм” эса тажрибасидан фойдаланиб, ҳимоя чизиғини мустаҳкамлашни режалаштирган.

Унга Англиядан ташқари, Европа ва ҳатто бошқа қитъалардан ҳам таклифлар бор. Аммо трансфер масаласи, табиийки, “Сити” қанча бадал сўрайди ва ўйинчи қанча маош талаб қилади — шу жиҳатларга боғлиқ бўлади.

Хулоса ўрнида…

“Манчестер Сити” энди фақат чемпионликка эмас, келажакка ҳам қарамоқда. Стоунзнинг кетиши бир даврнинг ёпилиши, Ҳусанов каби ёш иқтидорлар учун йўл очилиши бўлиши мумкин.

Сиз нима деб ўйлайсиз — Стоунз кетиши “Сити” учун йўқотишми ёки янги имкониятлар эшигими? Абдуқодир ушбу имкониятдан тўлиқ фойдалана оладими? «Замин»ни Telegram’да ўқинг!