“Қизилқум” устози “Навбаҳор” таслим этилган муҳим ўйин ҳақида нималар деди?

Суперлиганинг 8-туридан ўрин олган “Қизилқум” – “Навбаҳор” (3:2) учрашуви нафақат баҳснинг шиддати, балки жамоаларнинг қайтиш қобилияти ва майдондаги истаклари билан мухлислар хотирасида қолди. Беллашув якунида маҳаллий жамоа – “Қизилқум” қийин, аммо жуда муҳим ғалабага эришди.

Баҳсдан сўнг, навоийликлар бош мураббийи Никола Лазаревич матбуот анжуманида иштирок этиб, нафақат ўйин таҳлилини, балки жамоа кайфияти ва айрим футболчиларнинг ҳолати ҳақида ҳам очиқча гапирди.

“Бу ғалабани халқимизга бағишлаймиз – бугун тарихий кун”

“Энг аввало, бу ғалабани Навоий аҳлига бағишлашни истайман. Улар шу пайтгача 2 йил давомида ўз жамоасини ўз уйида кўришни кутди. Ниҳоят, бугун стадионда тўп тепдик ва мухлисларни хурсанд қилишга муваффақ бўлдик, деб ўйлайман.

Бу ютуқни жамоанинг барча аъзоси, шунингдек, клуб раҳбарияти ва футбол федарациясига бағишлайман. Улар бизга доимий қўллаб-қувватлов кўрсатишмоқда.

"Насаф"дан кўрилган 0:4 ҳисобидаги аламли мағлубиятдан сўнг, футболчилар билан очиқ суҳбат ўтказдик ва кейинги ўйинда бунга жавоб қайтаришга тайёргарлик кўрдик. Худога шукр, натижа ўзини кўрсатди.”

“Навбаҳорга қарши ўйин – тўлиқ 50га 50 бўлди”

“Биз “Навбаҳор”нинг кучли жамоа эканини билардик. Улар тўпни назорат қилади, ҳужумларни ташкил қилади ва маҳоратли ўйинчиларга эга. Шу боис, биз ушбу рақибга жиддий тайёргарлик кўрдик.

Бу ўйинни олдиндан тахмин қилиш қийин эди. Деярли 50га 50 ўтди. Омад биз томонда бўлди. Муҳими, жамоамиз ғалаба учун охиригача курашди.”

“Папаригада кичик пасайиш бор, аммо у ишдан тўхтагани йўқ”

“Папарига мавсумни жуда яхши бошлади. Белоруссиянинг "Нафтан" клубида ёрқин ўйинлар намойиш этган ва бизга иштиёқ билан қўшилган.

Албатта, ҳар бир футболчида турли давр бўлади – баъзи вақтларда форманинг пасайиши кузатилади. Папаригада шундай палла бўляпти, деб ҳисоблайман.

Лекин шуниси борки, у машғулотларда ҳар доим бор кучи билан ишламоқда. Бу бизни хурсанд қилади. Биз унга ишонамиз ва у қайта ўз юқори формасига қайтишига ишончимиз комил.”

“Раҳматуллаев шифокорлар тавсиясига кўра қайдномадан чиқарилган”

“Шаҳзод Раҳматуллаев бугун қайдномада йўқ эди. Бунга сабаб – ўтган ўйинда олган жароҳати. Шифокорлар тавсияси асосида унга бироз дам беришга қарор қилинди.

У шифо топгандан сўнг аста-секин тикланиш жараёнини бошлайди ва жамоага қайта қўшилади. У жамоамизнинг муҳим бўлагидир ва тез орада сафга қайтиши кутилаяпти.”

Хулоса ўрнида...

“Қизилқум” сўнгги йилларда ўз майдонида бундай муҳим ғалабани кам кўрганди. Лазаревич шогирдлари бугунги баҳсда ҳар жиҳатдан ўзини тўлиқ намоён қилди. Жамоа нафақат натижа учун, балки мухлислар учун ҳам ўйнаётганини кўрсатди.

Футболдаги ҳиммат, барқарорлик ва ишонч — бугун “Қизилқум”да эди. Энди навбатдаги турларда шу руҳни сақлаб қолиш жамоанинг асосий вазифасига айланади.

Сиз нима деб ўйлайсиз — “Қизилқум” бу мавсумда ўртажамоқ жамоа эмас, балки жиддий рақибга айланиши мумкинми? «Замин»ни Telegram’да ўқинг!