Раньери Италияни лол қолдирди: "Рома" устози мавсумнинг энг яхши мураббийи деб топилди

А Сериянинг 2024/25 йилги мавсуми ўз ниҳоясига етаётган бир пайтда, Италия футбол жамоатчилиги томонидан йилнинг энг яхши мураббийи аниқланди. Қизиғи шундаки, бу номга кутилганидек пешқадам "Наполи"ни бошқараётган Антонио Конте эмас, балки тажрибали ва қадрдон мутахассис Клаудио Раньери сазовор бўлди.

"Рома" клубини бошқараётган 73 ёшли Раньери Panini ҳамда Италия мураббийлар уюшмаси (AIAC) томонидан ўтказилган махсус сўровномада мутлақ устунлик билан ғалаба қозонди. У барча овоз берувчиларнинг 58 фоизининг ишончини қозонган ҳолда италиялик ҳамкасби Антонио Контени ортда қолдирди. Шу билан у А Серияда мавсумнинг энг яхши мураббийи сифатида расман эътироф этилди.

Раньерининг бу муваффақияти тасодиф эмас. Унинг қўл остида "Рома" жамоаси мавсум давомида мағлубиятсиз 19 учрашувлик серияни қайд этди, жамоа ҳужум ва ҳимояда мувозанатни топди. Элдор Шомуродов ва Артём Довбик каби футболчилар билан самарали тандемлар ташкил этиб, Рим клубини Европанинг энг кучли жамоалари қаторига олиб чиқишда ҳал қилувчи роль ўйнади.

Айни вақтда турнир жадвалида юқори ўринлардан жой олган "Рома" Чемпионлар Лигаси йўлланмаси учун кескин кураш олиб бормоқда. Мухлислар жамоа ўйинидан қониқиш ҳосил қилмоқда, Раньери эса яна бир бор ўзининг буюк мураббий сифатидаги қийматини намоён этди.

Сўров натижаларидан сўнг ташкилотчилар Клаудио Раньери шарафига махсус ҳайкалча тайёрлаётганини эълон қилишди. Бу соврин Италия футболининг энг муҳим рамзларидан бири ҳисобланган ва у ҳар йили А Серияда энг кўп эътироф этилган мутахассисга топширилади.

Клаудио Раньери учун бу фақат навбатдаги мукофот эмас. Бу — унга бўлган меҳр, ишонч ва эҳтиромнинг юксак ифодаси. Унинг жамоа билан ўзгаришлар қилаётгани, ёшларга ишонч билдириши ва тажрибасини уларга ўргатаётгани — бугунги италия футболи учун ўрнакли мактаб.

Маълумотларга кўра, ушбу мавсум якунланиши билан тажрибали мутахассис “Рома”ни тарк этиши мумкин. Агар шундай бўлса, Раньерининг бу муваффақиятли мавсуми Италия футболида у ёзиб қолдирган янги саҳифа сифатида тарихга киради.

Сиз нима деб ўйлайсиз — Раньери "Рома" билан яна бир мавсум қолиши керакми? «Замин»ни Telegram’да ўқинг!