Эммануэль Пети: “ПСЖ мағрурлик рамзи эди, Энрике келиб ҳаммасини ўзгартирди”

Франция футболи афсонаси, собиқ "Арсенал" ярим ҳимоячиси Эммануэль Пети ПСЖ жамоасига нисбатан ўз муносабатини очиқчасига билдириб ўтди. Унинг сўзларига қараганда, клубнинг аввалидаги мағрурлик ва индивидуализм руҳини энди жамоавийлик ва ихлос билан тўлдиришга ҳаракат қилинмоқда — бу эса Луис Энрикенинг салоҳияти билан боғлиқ.

"Мен Луис Энрикенинг ишқибози эмас эдим. У билан 'Барселона'да бир йил давомида бирга бўлганман. Лекин ҳозирда унинг ПСЖда амалга ошираётган ишларини томоша қилиб, ҳақиқатан ҳам ҳайратдаман", — деди Пети ўз интервьюсида.

Унинг таъкидлашича, ПСЖ авваллари унга хурсандлик эмас, аксинча, маънавий ноқулайлик келтирувчи жамоа бўлиб туюларди. "Ибрагимович жамоада бўлган пайтларданоқ, уларнинг муомаласи, атрофга тарқатаётган сигналлари мени ранжитарди. Улар гўёки: 'Бизда пул бор, ҳаммасини сотиб оламиз', деб туришарди. Шу даражадаки, мен телевизорни ўчириб қўярдим", — дейди у.

Пети фикрича, футбол — бу нафақат индивидуал маҳорат, балки жамоавий ҳамжиҳатликка асосланган ўйин. "Ҳар бир футболчи ўз ролини аниқ билиши керак. Қоидаларга риоя қилиниши зарур. Агар эгоманлик бошқа ҳар қандай ҳис-туйғулардан устун келса, у ҳолда бутун жамоа ичидаги муҳит емирилади", — дея қайд этди Пети.

Айни пайтда ПСЖ бош мураббийи сифатида фаолият юритаётган Луис Энрикега эса алоҳида эътироф берилди. Унинг нафақат тактик билимлари, балки психологик ёндашуви ва жамоа муҳитини яхшилашдаги ҳиссаси алоҳида таърифга лойиқ, деб ҳисоблайди Пети.

"У табассум қилишдан тортинмайди, оддий инсон сифатида ўзини тутади. Ҳатто француз тилида гапиришга ҳам ҳаракат қилади. Менга шундай туюляптики, Энрике нафақат тактика, балки ПСЖ брендининг умумий имижини ҳам ўзгартириш учун ҳаракат қилмоқда. Бу эса фақат олқишга лойиқ", — дея якунлади фикрларини Франция терма жамоасининг собиқ юлдузи. «Замин»ни Telegram’да ўқинг!