Суперлигада 10-тур старт олмоқда: марказий тўқнашувлар, мураббийлар жанги ва эҳтимолий камбеклар

Бугундан Ўзбекистон Суперлигасида 10-тур ўйинлари бошланади. Бу сафарги тур ҳам жиддий интрига, қайноқ баҳслар ва турнир жадвалига таъсир қилувчи натижалар билан ёдда қолиши кутилмоқда. Kелинг, ҳар бир учрашувга таҳлилий назар ташлаймиз.

“Сурхон” – “Сўғдиёна”: ёшлик ва тажриба тўқнашуви

Иккала жамоа ҳам турнир жадвалининг қуйи қисмида ва сўнгги турларда кутилган даражадаги натижаларни бера олмаяпти. “Сурхон”да ёшлар иштиёқи, Муҳаммадали Абдураҳмоновнинг кучли спринтлари ва шиддатли ҳаракатлари бор. “Сўғдиёна” эса балканлик легионерларига суянади. Ҳар икки жамоа “Алпомиш” аренасида тенг имкониятга эга, дуранг эҳтимоли юқори.

“Бухоро” – “Динамо”: дағал уриниш ёки аниқ тактика?

“Бухоро” ўтган турда “Пахтакор”дан ярим дузина гол қабул қилиб олган бўлса, “Динамо” эса Суперлигада ўзига хос барқарорлик кўрсатаётган жамоалардан бирига айланди. Ҳужумда унча фаол бўлмасада, самарадорлик юқори. Беллашув Тошкентда ўтказилиши ҳам самарқандликлар учун “плюс”. Бу баҳсда фаворит аниқ — “Динамо”.

“Қўқон-1912” – “Насаф”: кубок чарчоғи таъсир қиладими?

“Насаф” кубокдаги курашдан чиқиб кетган бўлса-да, Суперлигада 2-ўринни эгаллаб турибди. “Қўқон-1912” эса ўзига хос қарши ҳужумлар билан турнирнинг мазали жамоаларидан бири бўлиб турибди. Кубокдаги дам олиш кўпроқ қўқонликлар фойдасига ишлаши мумкин. Бироқ мутахассислик ва чуқурлик жиҳатидан “аждарлар” устун.

“Шўртан” – “Андижон”: мураббийлар жанги

Ғузордаги учрашувда икки янги мураббий тўқнашади — Элдор Мойлиев ва Максим Шацких. “Андижон”нинг таркиби ва даражаси юқорироқ, бироқ мезбонлар уйда омади келиши мумкин. Бир томонлама устунлик “Андижон” томонда.

“Бунёдкор” – “Навбаҳор”: турнинг марказий баҳси

Ёш ва тажриба уйғунлиги асосида шаклланган “Бунёдкор” бу мавсум ажойиб ритмда ҳаракат қилмоқда. “Навбаҳор” эса пасайишда. Ҳужумда эса етакчи Забиҳилло Ўринбоевдан кутилган “портлаш” ҳали кузатилмаяпти. Ҳар икки жамоа ярим ҳимояда тўлиқ курашга тайёр. Фаворит – “Бунёдкор”, аммо дуранг эҳтимоли ҳам бор.

“Хоразм” – “Машъал”: дурангга тўйинган тўқнашув

Иккала жамоа ҳам юқори лига муҳитига тўлиқ мослаша олмаяпти. Ўйинларда аниқ тактик тартиб кўзга ташланмайди. Шу сабабли, бу баҳсда икки жамоадан ҳам урушмаслик ва очко тақсимлаш кутилади.

“Қизилқум” – “Пахтакор”: “шерлар” яна югуришга тайёрми?

Тожиев қўл остида “Пахтакор” яна кучга тўлиб, кучли формага кирди. Кубокдаги “Насаф” устидан зафар ҳам мотивация бўлди. “Қизилқум” эса барқарорликда муаммога дуч келаётган жамоа. Мухлисларнинг ишончи ҳали тиклангани йўқ. Бу баҳсда ҳам “шерлар” аниқ фаворит, бироқ Навоийда ҳамиша осон эмас.

“ОКМК” – “Нефтчи”: турнинг асосий баҳси

1-ўриндаги ОКМК ўз майдонида 5-ўриндаги “Нефтчи”ни қабул қилади. Ҳар икки жамоа кубокда плей-оффга чиққан ва юқори кайфиятда. Лекин ОКМКда “камбеклар қироли” имижи шаклланган. Биринчи бўлимда “Нефтчи” етакчи бўлса, иккинчи бўлимда синовлар бошланади. Йўлдошев, Суюнов, Алибоев, Табатадзега қарши Санчес, Ғиёсов, Комилов, Собиржонов — бу дуэльни ўтказиб юборманг!

10-турда икки марказий ўйин, курашчан жамоалар ва натижаларни олдиндан айтиб бўлмайдиган вазиятлар бор. Суперлигада “ном” эмас, “майдондаги кураш” натижани ҳал қилади. Ҳар бир учрашув мухлис учун қизиқ ва кутилмаган сценарийларга бой бўлиши мумкин.

Zamin.uz таҳририяти барча баҳсларни диққат билан кузатишда давом этади. Сиз қайси учрашувни кутяпсиз? «Замин»ни Telegram’да ўқинг!