Модрич футболни ташламайди: 2026 ЖЧ ва янги клуб кутмоқда

Мадриднинг “Реал” клуби билан ажралмоқчи бўлган афсонавий плеймейкер Лука Модрич футболчилик фаолиятини якунлаш ниятида эмас. Испания матбуоти тарқатган сўнгги маълумотларга кўра, 39 ёшли хорватиялик маэстро клублар ўртасидаги жаҳон чемпионатидан сўнг “қироллик клуби”ни расман тарк этади ва фаолиятини бошқа жамоада давом эттиради.

Модрич келажакдаги йўналишини аниқ белгилаб бўлган — у 2026 йилги Жаҳон чемпионатида Хорватия терма жамоаси сафида яна бир бор кўриниш беришни мақсад қилган. Бу эса унинг яна камида икки йил юқори даражада тўп суриш нияти борлигини кўрсатади.

Испаниядаги манбалар унинг Мадриддан кўчиш нияти йўқлигини ва шу сабаб “Хетафе” ёки “Райо Вальекано” каби пойтахт клублари унинг янги манзилига айланиши мумкинлигини таъкидламоқда. Бу клублар Модричнинг тажрибаси ва профессионал ёндашувидан фойдаланиш орқали ўз сафини кучайтиришни режалаштирмоқда.

Бироқ янги маълумотларга қараганда, Италиянинг етакчи клубларидан бири — “Интер” ҳам Лука Модрични ўз сафида кўришга қизиқмоқда. Миланликлар бу масалада жиддий ва футболчига расмий таклиф бериш учун Европа Чемпионлар лигаси финалидан сўнг ҳаракат бошлашни режа қилган. “Интер” 31 май куни Мюнхендаги финалда “Пари Сен-Жермен”га қарши майдонга тушади.

Шунингдек, уммонортидан ҳам — АҚШ ва Саудия Арабистони каби футбол бозорлари ривожланаётган мамлакатлардан — Лука Модричга бир қатор клублардан таклифлар бўлгани маълум. Бу таклифлар молиявий жиҳатдан анча ёқимли, бироқ футболчи ҳозирча ўз қарорини ортга сурган ва жаҳон клублар чемпионатидан кейин барча таклифларни кўриб чиқишни режалаштирмоқда.

Лука Модричнинг 2012 йилдан буён “Реал” сафидаги фаолияти давомида 20 дан ортиқ совринни қўлга киритгани, жумладан, беш бор Чемпионлар лигаси ғолиби бўлгани уни клуб тарихидаги энг ёрқин фигуралардан бирига айлантирди. Унинг “Реал”ни тарк этиши жамоа мухлислари учун аламли бўлиши мумкин, аммо Модричнинг янги саҳифаси ҳали олдинда. У ҳали ҳам дунё футболида сўз айтишга тайёр.