Жаҳон чемпионатига йўл олдик: Европа экспертлари биз ҳақимизда нима дейишмоқда?

Ўзбекистон миллий футбол терма жамоасининг ўз тарихи давомида илк марта жаҳон чемпионатига йўлланмани қўлга киритгани нафақат мамлакатимизда, балки халқаро спорт жамоатчилигида ҳам катта акс-садо бермоқда. Бу ҳақида, жумладан, дунё футболида алоҳида ўринга эга бўлган Португалия ҳамда Бразилия каби мамлакатларда ҳам кенг ёзилмоқда. Европа ва Лотин Америкасининг нуфузли спорт нашрлари Ўзбекистон футболчиларининг катта ютуғи ҳақида ижобий муносабатларини билдирмоқда.

Эслатиб ўтамиз, миллий термамиз жаҳон чемпионатига йўлланмани Осиё минтақаси саралаш босқичининг ҳал қилувчи ўйинида Бирлашган Араб Амирликлари билан сафардаги мураккаб дуранг (0:0) орқали нақд қилди. Мазкур натижа Ўзбекистон футболининг янги тарихидаги энг муҳим воқеа сифатида эътироф этилмоқда.

Португалиялик машҳур футбол таҳлилчиси ва bolanarede.pt портали эксперти Диого Рибейро бу ҳақда қуйидаги фикрларни билдирган: "Ўзбекистон – Жаҳон чемпионати–2026да! Марказий Осиё мамлакатининг терма жамоаси БАА майдонида муҳим дуранг натижага эришиб, мундиал йўлланмасини қўлга киритди. Ўзбекистон ўзининг тарихида биринчи марта жаҳон чемпионатида иштирок этадиган биринчи терма жамоа бўлади. Бу мамлакат учун шубҳасиз тарихий воқеа. Ўзбекистон термаси олдин ҳеч қачон мундиалда иштирок этмаган ва келаси йил ёзида тарихий дебютини нишонлайди".

Рибейро ўз таҳлилида гуруҳдаги умумий вазиятга ҳам тўхталиб ўтди. Унинг айтишича, саралаш босқичининг учинчи давраси якунланишига атиги бир тур қолганида, Эрон ва Ўзбекистон гуруҳда биринчи ва иккинчи ўринларни эгаллаб, 2026 йилги мундиалга тўғридан-тўғри йўлланма олган. Қатар, БАА ва Қирғизистон эса мундиалга чиқиш учун курашни кейинги босқичларда давом эттиради.

Ўзбекистоннинг мундиалга йўлланма олиши Бразилия футболида ҳам катта қизиқиш уйғотди. Itatiaia.com.br сайтининг спорт таҳлилчиси Жон Питер Андрада ҳам миллий терма жамоамизнинг ушбу ютуғини алоҳида таъкидлади. Андрадага кўра, Ўзбекистоннинг БААга қарши сафардаги дуранги ҳақиқий финалга тенг бўлган. "Бу дуранг жамоага жаҳон чемпионати эшикларини очиб берди. Терма жамоа бу баҳсда рақибнинг катта босимига қарши туриб бера олди. Айниқса, Ўзбекистон дарвозабони Ўткир Юсупов жуда юқори даражада ҳаракат қилди, у бир неча хавфли вазиятларда жамоасини қутқариб қолди", – дея қайд этди бразилиялик эксперт.

Шунингдек, у Ўзбекистон миллий терма жамоасининг халқаро майдонда яхши танилган футболчилари – Италиянинг «Рома» клуби ҳужумчиси Элдор Шомуродов ва Англиянинг «Манчестер Сити» клубида фаолият юритаётган марказий ҳимоячи Абдуқодир Ҳусановга алоҳида эътибор қаратган. Экспертнинг фикрича, айнан шу каби юқори даражадаги футболчиларнинг борлиги Ўзбекистон термасининг халқаро майдондаги обрўсини оширмоқда.

Маълумки, Ўзбекистон миллий терма жамоаси ўз тарихидаги биринчи мундиал йўлланмасини муддатидан аввал нақд қилди. Учинчи саралаш босқичининг сўнгги турида футболчиларимиз 10 июнь куни Тошкентдаги "Бунёдкор" стадионида Қатар термаси билан ўйин ўтказишади. Бу ўйин термамиз учун муҳим аҳамиятга эга бўлмасада, мамлакатимизда ҳақиқий футбол байрамига айланиши кутилаётгани аниқ.

Энди эса терма жамоамиз учун жаҳон чемпионатига тайёргарлик янги босқичга ўтади. Бутун мамлакатимиз, футбол ишқибозлари, футболчилар ва мутахассислар мундиалда иштирок этиш орзусининг амалга ошганини мамнуният билан қарши олишмоқда. Ҳар бир футбол мухлиси жамоамизнинг АҚШ, Канада ва Мексикада бўлиб ўтадиган жаҳон чемпионатидаги ўйинларини интиқлик билан кутмоқда. Бу иштирок мамлакатимизда футболнинг янада ривожланиши, ёш авлоднинг спортга қизиқишининг кучайиши учун катта туртки бўлишига ишончимиз комил.

Бу тарихий воқеа, шубҳасиз, Ўзбекистон спортининг энг ёрқин саҳифаларидан бири сифатида футбол тарихи саҳифаларида абадий сақланиб қолади. Миллионлаб мухлислар учун бу энди орзу эмас, балки ҳақиқий воқеликдир. Жаҳон чемпионати майдонларида Ўзбекистон миллий термасининг дунёнинг энг кучли жамоалари билан тенгма-тенг курашиши, шубҳасиз, мамлакатимиз обрўсини янада оширади. Биз терма жамоамизга келгуси ўйинларда улкан муваффақиятлар тилаймиз!