Жаҳон чемпионатига чиқдик: Европа клублари ҳам биз билан байрамда!

Ўзбекистон миллий терма жамоаси футбол тарихида янги саҳифа очди. Мамлакатимиз шарафини ҳимоя қилаётган футболчиларимиз узоқ йиллик орзуларни амалга ошириб, биринчи марта жаҳон чемпионатида қатнашиш ҳуқуқига эга чиқишди. Бу тарихий воқеа 2026 йилда АҚШ, Канада ва Мексика давлатлари мезбонлик қиладиган мундиал саралаши доирасида Бирлашган Араб Амирликларига қарши бўлиб ўтган ҳал қилувчи учрашувда қайд этилди.

Ушбу ўйин учун миллий жамоамизга дуранг натижа ҳам кифоя эди. Бироқ майдон эгалари учун ягона мақсад – фақат ғалаба эди. Шу боисдан БАА терма жамоаси бу баҳс олдидан жиддий ўзгаришлар қилди. Жумладан, амирликлар миллий жамоасининг бошқаруви румин мутахассиси Космин Олариуга топширилди. Шунингдек, жамоага Бразилиядан келиб маҳаллийлаштирилган 5 нафар юқори савияли футболчилар қўшилди. Бу эса ўйин олдидан рақибимизга қўшимча устунлик беришга уриниш сифатида баҳоланди.

Тўқсон дақиқадан ортиқроқ давом этган учрашувда жуда қаттиқ ва асабий кураш кечди. Мезбонлар бир неча хавфли вазиятлар яратди, аммо Ўзбекистон терма жамоаси мураббийи Тимур Кападзе томонидан пухта ўйланган тактика ва футболчиларнинг жанговор руҳи керакли натижани таъминлади. Айниқса, жамоа дарвозабони Ўткир Юсупов бир нечта ажойиб сейвлар билан жамоа дурангни сақлаб қолишига катта ҳисса қўшди. У бу ўйинда ҳақли равишда учрашувнинг энг яхши ўйинчиси сифатида эътироф этилди.

Табиийки, бу ғалаба мамлакатимиз учун улкан байрамга айланди. Миллий термамизнинг ушбу улкан муваффақияти нафақат Ўзбекистонда, балки халқаро майдонда ҳам катта шов-шувга сабаб бўлмоқда. Бутун дунёдаги футбол мухлислари, нуфузли клублар ва экспертлар бу янгиликка эътибор қаратмоқда. Жумладан, жамоамизнинг етакчилари бўлган футболчиларнинг Европа клублари ҳам бу воқеага бефарқ қолишмади.

Италиянинг машҳур "Рома" клуби миллий терма жамоамиз сардори ва ҳужумчиси Элдор Шомуродовни табриклаб, ўзининг расмий веб-сайти ҳамда ижтимоий тармоқлардаги саҳифаларида қуйидаги баёнотни тарқатди:

«Элдор Шомуродовни тарихий натижа билан самимий табриклаймиз! У ўз терма жамоаси сафида мамлакат футбол тарихида илк бор жаҳон чемпионатига йўлланма олди ва биз унинг ушбу муваффақиятидан ғурурланамиз».

Элдор Шомуродов ҳақиқатдан ҳам миллий жамоа учун ҳал қилувчи ўйинларда муҳим рол ўйнади. У саралаш босқичларида Туркманистон, Қирғизистон ҳамда Гонконг дарвозаларига голлар киритиб, жамоага муҳим очколар олиб келди. Саралашдаги ўйинларда у жами 4 та гол ва 4 та голли пас бериб, умумий ҳисобда 8 та голга бевосита таъсир кўрсатди. Элдор Шомуродов Ўзбекистон миллий терма жамоасининг энг яхши тўпурари ҳисобланади – у миллий жамоа либосидаги 81 та ўйинда 41 марта рақиб дарвозасини ишғол қилган.

Шу билан бирга, миллий жамоамизнинг яна бир етакчи футболчиси, Россиянинг ЦСКА клуби ярим ҳимоячиси Аббосбек Файзуллаев ҳам ўз клубидан илиқ табрик қабул қилди. Москвалик клуб ўзининг расмий канали орқали ёш футболчимизни қуйидаги сўзлар билан табриклади:

«Аббосбек Файзуллаев ва Ўзбекистон миллий терма жамоасини ушбу тарихий натижа билан чин дилдан муборакбод этамиз! Аббос ва унинг жамоаси ўз тарихида илк бор жаҳон чемпионатига йўлланма олиб, барчамизни қувонтирди!»

Аббосбек Файзуллаев миллий терма жамоага 2023 йили биринчи марта жалб этилган бўлса-да, қисқа муддатда асосий ўйинчилардан бирига айланди. Саралаш босқичи давомида у Қатар дарвозасига икки марта, Шимолий Корея ва Эрон термаларига биттадан гол урди ҳамда икки марта голли пас беришга муваффақ бўлди. У миллий жамоа сафида жами 26 та учрашувда майдонга тушиб, 8 та гол киритди.

Ҳозирда Ўзбекистон футбол мухлислари тарихий натижанинг завқини сурмоқда. Эндиликда улар АҚШ, Канада ва Мексика мезбонлик қиладиган мундиалда миллий терма жамоамизга катта умидлар билан қарашмоқда. Ўзбекистон термасининг халқаро майдондаги ушбу иштироки мамлакатимиз футболининг янги даврини бошлаб беради. Мухлислар учун ҳам, футболчилар учун ҳам бу фақат бошланиши бўлиб, олдиндаги йўлда яна катта-катта ғалабалар кутиб турибди.

Ҳозирча эса миллий жамоамиз ушбу катта ғалабани нишонламоқда ва юртимиз футбол ишқибозлари улар билан биргаликда байрам кайфиятида! «Замин»ни Telegram’да ўқинг!