Жалолиддин Машарипов: "Биз бугун тарихни ёздик, чунки бир оиламиз!"

Ўзбекистон миллий терма жамоасининг етакчи футболчиси Жалолиддин Машарипов БАА терма жамоасига қарши муҳим ўйиндан кейин ўз ҳиссиётлари билан бўлишди. Машарипов бу ўйин ўзининг ва жамоадошларининг бутун фаолиятидаги энг мураккаб ва босимга тўла баҳс бўлганини таъкидлади.

«Ростини айтсам, бугунги баҳс ҳаётимиздаги энг оғир ва энг масъулиятли учрашувлардан бири бўлди. Ўйин олдидан биз сезган босим ниҳоятда юқори эди, чунки бу учрашув натижасига кўра, биз фақат ғалаба ёки дурангга эришишимиз шарт эди. Лекин биздаги кайфият шундай эдики, гўё фақат ғалаба бизга керакдек эди. Майдонда ҳар биримиз бор кучимиз билан ҳаракат қилдик ва натижада зарур бўлган очкони қўлга киритиб, мундиал йўлланмасини нақд қилдик. Бу ғалабамиз билан юртимизнинг миллионлаб мухлисларини хушнуд қилганимиздан жуда бахтиёрмиз», – деди Машарипов.

Шунингдек, Жалолиддин ўтмишдаги миллий жамоалар таркибида ҳозирги футболчилардан кўра кўплаб кучли ва индивидуал маҳорати юқори ўйинчилар бўлганини қайд этди. Бироқ унинг фикрича, ўша пайтда футболчилар орасида ҳозиргидек жамоавий бирлик ва уйғунлик бўлмаган.

«Ўйлашимча, аввалги саралаш босқичларида майдонга тушган футболчилар шахсий кўрсаткичлари бўйича биздан кучлироқ бўлган бўлиши мумкин. Лекин уларда биз каби бир бутун жамоавий руҳ йўқ эди. Ҳозирги таркибимиз билан биз ягона оиладек бўлиб, ҳар бир учрашувда бир-биримизни қўллаб-қувватлаб, ёрдам беришга ҳаракат қиламиз. Айнан шу кучли жамоавий руҳ туфайли, биз тарихий ғалабани қўлга киритдик», – деб таъкидлади Машарипов.

Жалолиддин Машариповнинг бу сўзлари миллионлаб мухлисларнинг дилидан жой олди ва жамоанинг бугунги муваффақиятини янада ёрқинроқ намоён этди. Бу ғалаба орқали Ўзбекистон миллий жамоаси ўз тарихида илк марта жаҳон чемпионатида иштирок этиш ҳуқуқига эга бўлди.

Манба: championat.asia