Виктор Осимхеннинг трансфери нега “Ал-Ҳилол”да амалга ошмади?

Мазкур ёз мавсуми Европа ва Осиё футбол бозорида яна бир сенсацион хабар билан эътибор марказида бўлди. Туркия чемпионатида “Галатасарой” сафида ижарада тўп сурган ва аслида “Наполи”га тегишли бўлган нигериялик ҳужумчи Виктор Осимхен айни пайтда ўз келажаги юзасидан катта ноаниқлик ичида қолмоқда.

Кўплаб футбол нашрлари, хусусан, Африка ва Европа спорт ОАВлари айни пайтда Осимхен Саудия Арабистонининг “Ал-Ҳилол” клуби билан кескин музокаралар олиб боргани, унга ҳар мавсум учун рекорд даражада — 35 миллион евро маош таклиф қилингани ҳақида ёзишган эди. Нигериялик тўпурарнинг “Ал-Ҳилол”га ўтиши футбол оламида жиддий шов-шувларга сабаб бўлди.

Бироқ, таниқли журналист Саша Твольер тарқатган сўнгги маълумотларга кўра, шайхлар бу трансфердан кескин воз кечишга қарор қилган. Манба маълумотларига кўра, Осимхеннинг беқарор ва ўзгарувчан характери, молиявий масалалардаги муросасизлиги араб ишбилармонларига ёқмаган. Аввалига барча шартлар бўйича келишувга эришилганига қарамасдан, кейинчалик футболчининг янада кўпроқ маблағ талаб қилишга ҳаракат қилиши, “Ал-Ҳилол” раҳбариятини ранжитган ва трансфернинг ёпилишига сабаб бўлган.

Шундай қилиб, “Ал-Ҳилол” клуби ўз диққатини бошқа машҳур ва интизомли футболчиларга қаратишга қарор қилди. Шу билан бирга, Осимхен учун бу воқеа футболдаги келажагини қайта йўналтириш ва яна бошқа клубларни излашга мажбур қилди. Тахминларга кўра, ҳозирча “Наполи” ҳам нигериялик ҳужумчини ўз сафига қайтариш ниятида эмас ва Европа, шунингдек, бошқа қитъалардаги клублар унинг хизматларига қизиқиш билдиради.

Мазкур воқеа футбол бозорида молиявий келишувлар ва футболчи интизомининг нақадар муҳим аҳамият касб этишини яна бир бор намоён қилди. Виктор Осимхен эса, катта иқтидорига қарамасдан, янги жамоа излашда давом этмоқда. Футбол муҳлислари эса, унинг келажаги қайси жамоада давом этишини катта қизиқиш билан кутмоқда.