Қатар ва Саудияда мундиал учун ҳал қилувчи ўйинлар бўлиб ўтади

Осиё футбол конфедерацияси (ОФК) 2026 йилги Жаҳон чемпионати саралашининг муҳим босқичларидан бири – плей-офф босқичининг мезбонларини расман эълон қилди. Унга кўра, Қатар футбол уюшмаси ва Саудия Арабистони футбол федерацияси ушбу марказлаштирилган турнирга мезбонлик қилади.

Мазкур босқичда ЖЧ 3-саралаш босқичида 3 ва 4-ўринларни эгаллаган қуйидаги олти жамоа иштирок этади:
- Индонезия
- Ироқ
- Ўмон
- Қатар
- Саудия Арабистони
- Бирлашган Араб Амирликлари

Улар 2025 йил 8–14 октябрь кунлари давомида икки гуруҳга ажратилиб, гуруҳ ичидаги ўйинларда ўзаро беллашади. Ҳар бир гуруҳда 3 тадан терма жамоа жой олади. Гуруҳда 1-ўринни эгаллаган жамоалар тўғридан-тўғри 2026 йилги Жаҳон чемпионатига йўлланма олади.

Бу билан плей-оффнинг асосий мақсади – Осиёдан мундиалга йўл олмоқчи бўлган жамоалар учун сўнгги имкониятни тақдим этишдир. Қолган икки гуруҳдаги 2-ўрин эгалари эса қўшимча имкониятни қўлга киритиш учун яна бир имтиҳондан ўтишади. Улар 2025 йил 13 ва 18 ноябрь кунлари икки ўйиндан иборат бўлган ўзаро беллашувда иштирок этади. Ундаги ғолиб кейинчалик ФИФАнинг интерконтинентал плей-оффида кураш олиб боради.

Таъкидлаш жоизки, расмий қуръа ташлаш маросими 2025 йил 17 июл куни ташкил этилиши режалаштирилган. Унда қайси жамоа қайси гуруҳга тушиши ва ўйинлар жадвали аниқланади.

Шунингдек, мухлисларимиз учун эслатма сифатида қайд этамиз: Ўзбекистон миллий терма жамоаси ўз гуруҳидаги ўйинларни муваффақиятли якунлаб, 5 июнь куни БАА билан 0:0 ҳисобидаги дуранг натижасидан сўнг муддатидан олдин мундиалга йўлланма олган эди.

Шу тариқа, 2026 йилги Жаҳон чемпионатига олиб борувчи йўлда Осиёдаги кураш янада қизғин тус олмоқда. Ҳар бир жамоа учун бу сўнгги шанс ва ўзига хос имтиҳон ҳисобланади.