“Галатасарой” клуби "Бавария" юлдузларига тўрт томондан ҳужум бошлади

Европа футболида трансфер ойнаси қизғин паллага кирган бир пайтда, Туркиянинг энг нуфузли клубларидан бири – “Галатасарой” ҳам катта ўзгаришлар билан янги мавсумга тайёргарликни бошлади. Истанбул клуби ички чемпионликни қўлга киритиши билан кифояланмасдан, Европа миқёсида ҳам жиддий рақобатчига айланишни мақсад қилмоқда.

Мавсум якунланиши билан турклар “Бавария”нинг асосий ҳужумчиларидан бири Лерой Санени ўз сафига қўшиб олганини эълон қилди. Бу трансфер Европа футболи оммавий ахборот воситаларида катта шов-шувларга сабаб бўлди. Лерой Сане сўнгги йилларда “Бавария” таркибида мунтазам равишда тўп суриб келган ва унинг Истанбулга йўл олиши кўпчилик учун кутилмаган ҳолат бўлди.

Маълумотларга кўра, Саненинг “Галатасарой” билан шартномаси уч йил муддатга тузилган ва у янги мавсумдан бошлаб Туркия Суперлигасида ўз маҳоратини намоён этади. Бу эса, клубнинг фақат Туркия доирасида эмас, балки Европа аренасида ҳам катта мақсадларни кўзлаётганидан далолат беради.

Истанбулликлар бу билан чекланиб қолмоқчи эмас. Туркия оммавий ахборот воситаларида тарқалган хабарларга кўра, “Галатасарой” “Бавария”дан яна тўрт нафар футболчини ҳам ўз таркибига қўшиб олиш истагида. Гап ҳимоячи Саше Боэ, ярим ҳимоячи Леон Горецке, марказий ҳимоячи Ким Мин-Жэ ва қанотдаги тезкор футболчи Кингсли Коман ҳақида кетмоқда.

Агар ушбу трансферлар амалга ошса, “Галатасарой” нафақат Туркияда, балки Европа миқёсида ҳам катта кучга айланиши мумкин. Леон Горецка – Германия терма жамоасининг тажрибали аъзоси, майдон марказида ўйин темпини белгилайдиган футболчи сифатида танилган. Коман эса қанотдаги чапдаст югуришлари ва тезкор рейдлари билан рақиб ҳимоячиларига бош оғриғи келтира олади. Ким Мин-Жэ ва Боэ эса ҳимоядаги мустаҳкамликни таъминлайдиган номзодлар сифатида кўрилмоқда.

“Галатасарой”нинг бундай жиддий трансфер сиёсати клубнинг келгуси мавсумда Чемпионлар Лигасида катта натижалар кўрсатишни кўзлаётганини англатади. Айниқса, ўтган мавсум Европа Лигасининг 1/16 финалида муваффақиятсиз иштирокдан сўнг, жамоа халқаро майдонда ўз нуфузини тиклашни қатъий мақсад қилган.

Эслатиб ўтамиз, “Галатасарой” жорий мавсум Туркия чемпионатида бошдан-охир устунликни сақлаб қолди ва сўнгги турда ҳам асосий рақобатчи “Фенербахче”ни орқада қолдириб, титулни ўз номига расмийлаштирди. Туркия кубогида ҳам муваффақият қозониб, миллий иккиликка эришди. Энди эса навбат Европа саҳнасига чиқиш.

Туркия футболини севувчилар учун бу трансферлар албатта қувончли янгилик. Бундаги энг қизиқ жиҳат шундаки, “Галатасарой” нафақат номдор футболчиларни жалб этмоқда, балки уларнинг юқори формаси, тажрибаси ва менталитети орқали жамоанинг ички сифати ва рақобатбардошлигини янада оширмоқда.

Жамоа сафидаги катта ўзгаришлар, юқори мақсадлар ва салоҳиятли трансферлар “Галатасарой”нинг келажакда Европанинг элита клублари билан тенглашиш орзусини амалга ошириш йўлидаги муҳим қадамлардан бири сифатида баҳоланмоқда. Кўрамиз, Лерой Сане ва эҳтимолий янги келувчилар билан “Галатасарой” қандай натижалар кўрсата олади? Мухлислар эса кутмоқда – катта умид ва сабр билан. «Замин»ни Telegram’да ўқинг!