Европани зериктирган Элдорга энди турклар навбатда туришибди

Ўзбекистон миллий терма жамоасининг сардори ва 2026 йилги Жаҳон чемпионати йўлланмасини таъминлаган асосий тўпурари Элдор Шомуродов атрофида ёз мавсуми билан бирга янги трансфер шов-шувлари бошланди. Итальян футболида фаолият юритиб келаётган ўзбек форвардининг “Рома” клубидаги келажаги ҳозирча ноаниқ бўлиб турибди. Унга бўлган талаб эса тобора ортиб бормоқда.

Маълумки, “Рома” жамоасида мавсум якунлангач, бош мураббий ўзгарди. Элдорнинг профессионал ўсишига катта таъсир кўрсатган ва унга ишонган мутахассис — Клаудио Раньери жамоани тарк этди. Унинг ўрнига эса “Аталанта” билан танилган Жан Пьеро Гасперини келди. Бу албатта таркибда жиддий ўзгаришлар бўлишига сабабчи бўлмоқда. Италия футболи таҳлилчиларига кўра, Гасперини ҳужум чизиғида илк навбатда ислоҳот ўтказишни мақсад қилган.

Шундай вазиятда, бир неча йиллардан буён Европанинг юқори савиядаги чемпионатларида ўзини кўрсатаётган футболчиларга қизиқиш билдириб келаётган Туркия Суперлигаси клублари ҳам қўл қовуштириб ўтирмайди. Хусусан, gazetearena.com сайти ёзишича, Туркиянинг машҳур клубларидан бири — “Башакшеҳир” ўз ҳужумини кучайтириш мақсадида айнан Элдор Шомуродов номзодига жиддий эътибор қарата бошлаган.

“Галатасарой”, “Фенербахче”, “Бешиктош”, “Трабзонспор” каби клублар ўз трансфер рўйхатларини шакллантириш билан овора бўлиб турган бир пайтда, “Башакшеҳир” Шомуродов билан бевосита музокараларга киришгани айтилмоқда.

Маълумотларга кўра, Элдор “Рома” сафидаги сўнгги мавсумда 37 учрашувда майдонга тушган. Ушбу баҳсларда у 7 та гол ва 5 та голли узатма муаллифига айланган. Гол уришдаги самарадорлиги ҳар 209 дақиқага тўғри келган бўлса-да, кўпгина ўйинларда у тўлиқ ҳаракат қилмаганини инобатга олсак, бу кўрсаткич етарли даражада яхши деб баҳоланмоқда.

Шомуродовнинг футболга бўлган қизиқиши “Машъал” академиясида шаклланган. Кейинчалик у “Бунёдкор” сафида порлаб, 2017 йили Россиянинг “Ростов” клубига йўл олди. Бу трансфер орқали у халқаро майдонга чиққан ва уч йил давомида трансфер баҳоси 750 минг евродан 6,5 миллион еврогача ошган. Кейинчалик, 2020 йил “Женоа” футболчисига айланган Элдор учун клуб 9,5 миллион евро тўлаган. Ордан икки мавсум ўтиб, “Рома” уни 19,5 миллион евро эвазига ўз сафига қўшган.

Ўзбек футболида бундай йўналишдаги карьерага эришган футболчилар саноқли. Элдорнинг клуб даражасидаги ютуқлари, миллий терма жамоадаги катта ҳиссаси ва 82 учрашувда 42 та гол уришга эришгани уни ўз юртида энг кучли ҳужумчига айлантирди. Бўйи 1,90 метр келадиган ҳужумчи ҳар икки қанотда, марказий ҳужумчи сифатида ва ҳатто икки ҳужумчи схемасида ҳам мукаммал ҳаракат қила олади.

Айни дамда “Башакшеҳир” клуби ва футболчининг агентлари ўртасида музокаралар давом этмоқда. Хабарларга қараганда, томонлар ўртасида келишувга эришиш эҳтимоли жуда юқори. Турк Суперлигаси ўзбек юлдузи учун янги чақирув бўлиши мумкин.

Шундай қилиб, Элдор Шомуродов учун навбатдаги манзил Туркия бўладими, ёки у яна Италияда қоладими — бу яқин орада маълум бўлади. Бир нарса аниқ: у қандай қарор қилмасин, ўзбек мухлислари уни қўллаб-қувватлашда давом этади. «Замин»ни Telegram’да ўқинг!