“Реал”нинг ёш юлдузи Эндрике мавсумни жароҳат билан бошлайди

Мадриднинг “Реал” жамоаси янги мавсум бошида яна бир муҳим йўқотишга дуч келди. Жамоанинг ёш ва иқтидорли ҳужумчиси Эндрике жароҳат сабаб икки ойга сафдан чиқди, деб ёзмоқда Footbal Espana.

Маълумотларга кўра, футболчи клублар ўртасидаги Жаҳон чемпионати доирасидаги машғулот пайтида сон қисмининг мушакларини жиддий жароҳатлаб олган. Бу ҳолат уни Ла Лиганинг дастлабки босқичидан четда қолишига олиб келади.

Эслатиб ўтамиз, Испания чемпионатининг янги мавсуми 19 август куни старт олади. Ўша куни “қироллик клуби” ўз уйида “Осасуна” жамоасини қабул қилади. Аммо Эндрике ушбу баҳсда жамоасига ёрдам бера олмайди.

Эндрике – “Реал”нинг истиқболли футболчиларидан бири ҳисобланади. 18 ёшли бразилиялик ёшлар ўртасида ҳам аллақачон ўз сўзини айтган. Ўтган мавсум у 37 та учрашувда майдонга тушган бўлиб, 7 та гол киритган ва 1 та голли узатма амалга оширган. Унинг майдондаги ҳаракатчанлиги ва ҳужумдаги фаоллиги жамоа мураббийлари томонидан алоҳида баҳоланган.

Мураббийлар штаби футболчининг соғлиги билан боғлиқ масалада эҳтиёткорликни танлади. Шу боис, Эндрикенинг тўлиқ тикланишигача уни майдонга тушириш режалаштирилмаяпти. Бу қарор унинг келажагини сақлаб қолиш ва жиддийроқ жароҳатларнинг олдини олиш мақсадида қабул қилинди.

Футбол жамоатчилиги ва мухлислар Эндрикенинг тезроқ сафга қайтишига умид билдирмоқда. Жамоа эса унинг йўқлигини ҳис қилмаслик учун таркибдаги бошқа вариантларни кўриб чиқмоқда.

“Реал Мадрид” янги мавсумга катта иштиёқ билан кириб келмоқда, аммо Эндрикенинг жароҳати клуб учун жиддий синовлардан бири бўлиши мумкин. «Замин»ни Telegram’да ўқинг!