"Андижон" мураббийлар штабига украиналик мутахассис қўшилди

Янги мавсумга пухта тайёргарлик кўраётган жамоалар фақат ўқув-машғулот йиғинлари билан чекланиб қолмаяпти. Улар селекция ишларига ҳам жиддий ёндашишмоқда. Айниқса, мураббийлар штаби таркибига малакали мутахассисларни жалб этиш – муҳим вазифага айланган.

Шу жиҳатдан Тожикистонда йиғин ўтказаётган "Андижон" клуби жиддий қадам ташлади. Жамоа мураббийлар штаби янги мутахассис билан тўлдирилди. Расмий хабарга кўра, украиналик Николай Тишенко эндиликда жамоада аналитик мураббий сифатида иш бошлади.

Футбол муҳлисларига бегона бўлмаган Тишенко аввалроқ ҳам бир қатор клубларда ўзини синаб кўрган. У 1987 йилнинг 12 декабрида дунёга келган бўлиб, сўнгги икки йил – 2023 ва 2024 йилги мавсумларда юртимиз чемпионатида, яъни Муборакнинг “Машъал” клубида фаолият юритган.

Николай Витальевичнинг мураббийлик фаолияти фақат Ўзбекистон билан чегараланиб қолмаган. Унинг меҳнат йўли Украинадаги “Агродим” ва “Еднисть” клубларида, шунингдек, Латвиянинг “Рига” жамоасида ҳам давом этган. Сўнгги пайтларда эса Қирғизистоннинг “Мурас Юнайтед” клубида ишлаб келган.

Айнан шу тажриба, турли мамлакатларда йиғилган билим ва таҳлил қобилияти "Андижон" жамоасига катта фойда келтириши кутилмоқда. Замонавий футболда рақибни синчковлик билан ўрганиш, ўйин таҳлиллари асосида стратегия тузиш жуда муҳим. Бу борада Николай Тишенко жамоага янги нафас олиб кириши мумкин.

Мухлислар эса янги мутахассиснинг жамоага қандай таъсир кўрсатишини қизиқиш билан кузатмоқда. Сабаби, ҳозирги футбол фақат майдондаги кураш эмас – у таҳлил, режа ва жамоавий ҳаракатни талаб қилади.

Қизиғи шундаки, бу каби таҳлилчи мураббийлар – кўпинча жамоа ютуқларининг ортидаги “кўринмас қаҳрамон” сифатида баҳоланади. Балки айнан Тишенконинг келиши билан "Андижон" жамоаси ўйинида сезиларли ўзгаришлар юз берар… «Замин»ни Telegram’да ўқинг!