Туркия Суперлигаси охирги йилларда Европада энг жадал ўсиш ва ривожланишни намоён этаётган чемпионатлар қаторига киргани барчамизга маълум. Турк футбол клублари сўнгги пайтларда жаҳоннинг тан олинган ўйинчилари ҳамда тажрибали мураббийларини ўз жамоаларига жалб этишда фаол ҳаракат қилмоқда.
Шу жараёнда турк клубларида тўп тепаётган ўзбекистонлик футболчилар сони ҳам ортиб бораётгани қувонарли ҳол. Масалан, бир неча мавсум аввал Отабек Шукуров “Фотиҳ Карагюмрюк” ва “Кайсериспор” жамоаларида муваффақиятли ўйин кўрсатган эди. Шунингдек, ўтган мавсум Азизбек Турғунбоев “Сивасспор” шарафини, Ҳусниддин Алиқулов эса “Ризеспор” шарафини ҳимоя қилган.
Келгуси мавсум бошланиши билан ўзбекистонлик футбол ишқибозлари Туркия чемпионатида айниқса “Истанбул Башакшеҳир” клубига кўпроқ қизиқиш билан қарамоқда. Ўтган мавсумни бешинчи ўринда якунлаган бу жамоа яқинда ўз таркибини Элдор Шомуродов билан тўлдирди.
30 ёшга кирган ҳужумчимиз, УЕФА Конференциялар лигаси иккинчи саралаш босқичида Болгариянинг “Черно Море” клубига қарши ўйинда илк марта “Башакшеҳир” таркибида майдонга тушди ва ўзининг расмий дебютини нишонлади.
Бундан ташқари, “Истанбул Башакшеҳир” таркибини яна бир ўзбек таланти — Аббосбек Файзуллаев ҳам кучайтириш арафасида. Турк футболи ҳақида пухта билимга эга россиялик эксперт Эльвин Керимовнинг таъкидлашича, Файзуллаев ушбу клубда ўз сўзини айта олади ва етакчилардан бирига айланиши мумкин.
Керимовнинг фикрига кўра: “Аббосбек Файзуллаев нафақат “Истанбул Башакшеҳир” учун, балки бутун лига учун юлдузга айланиш имкониятига эга. Жамоа жуда нуфузли ва мўътабар, ундаги ўйинчилар орасида супер юлдузлар кўп эмас, лекин ҳаракатда барқарорлик юқори. Эътиборга молик футболчилардан бири — Уссейн Ба. Бу ҳимоячи ўз вақтида “Олимпиакос”да анча йил тўп сурган ва Еврокубокларда катта тажриба тўплаган.”
Керимов яна шундай фикр билдирди: “Клуб сафида яна бир қимматли ўйинчи – “Бешиктош”дан келган, Туркия миллий жамоасида ҳам ўйнаган Онур Булут бор. Унинг малакасига шак-шубҳа йўқ. Шунингдек, Дениз Тюрюч ҳам “Фенербаҳче” ва Туркия терма жамоасидаги тажрибаси билан ажралиб туради. Айниқса, унинг “Олд Траффорд”даги жарима зарбасидан “Манчестер Юнайтед”га урган голи мухлислар ва мутахассислар хотирасидан ўчмаган.”
Таянч ярим ҳимояда Берат Ўздемир “Трабзонспор” билан чемпионликка эришган. Португалиялик легионер Мигель Крешпу эса, ўз юртида машҳур мураббий Жоржу Жезуш қўли остида муҳим рол ўйнаган.
Шунингдек, “Истанбул Башакшеҳир” сафида Германия футболида тарбия топган Беркай Ўзжан ва “Марсель”да ўсган, бир неча йил аввал Туркия чемпионатини ларзага келтирган Юсуф Сари ҳам бор.
Ҳужум чизиғида эса Германия Бундеслигасида тажриба орттирган Дейви Зельке тўп суради. У “Вердер”, “Герта”, “Лейпциг”, “Кёльн” каби грандларда ўз номини тиклаган.
Клубнинг дарвозабони Муҳаммад Шенгезер эса Туркия чемпионатида оёқда тўпни яхши ўйнай оладиган посбонлардан бири сифатида эътироф этилади. Шунингдек, у Конференциялар лигасида икки голли пас билан ҳам мухлисларни лол қолдирган.
Бош мураббий Чағдаш Атан учун жамоадаги ҳар бир ўйинчининг салоҳияти ва профессионаллик даражаси жуда катта аҳамиятга эга эканини Эльвин Керимов ҳам алоҳида таъкидлади.
Шуни ҳам эслатиш жоизки, “Истанбул Башакшеҳир”нинг яна бир янги ҳужумчиси Элдор Шомуродов ҳам ўз маҳорати ва тажрибаси билан ажралиб туради. “Рома”дан тўлиқ трансфер қилиш ҳуқуқи билан ижарага олинган бу ўзбек футболчиси клубнинг энг қимматли икки ўйинчисидан бири бўлиб турибди.
Transfermarkt портали маълумотларига кўра, Шомуродов ва ганалик Жером Опокунинг трансфер баҳоси 5 миллион еврони ташкил этади.
Эътиборлиси, Аббосбек Файзуллаев “Башакшеҳир”га ўтганидан сўнг, жамоанинг энг қиммат футболчисига айланади. Чунки 21 ёшли ҳужумчимиз transfermarkt’да 8 миллион евро бўйича баҳоланган.
Бундай ўзгаришлар ва янги имзолар Туркия Суперлигасида ўзбек футболчиларининг нуфузи ва ролини янада ошириши табиий. Янги мавсумда бу йигитлардан ким қандай натижа қилади — мухлислар катта ишонч ва қизиқиш билан кузатишда давом этади.
«Замин»ни Telegram’да ўқинг!
