Суперлига 20-туридан ўрин олган “Қизилқум” – “Бунёдкор” учрашуви мухлислар хотирасида кескин ва драматик баҳс сифатида қолди. Навоийда бўлиб ўтган беллашув 1:1 ҳисобида якунланди. Учрашувдан кейин пойтахт клуби бош мураббийи Илёс Зейтуллаев матбуот анжуманида иштирок этиб, ўйин борасида ўз фикрлари билан ўртоқлашди.
— Ўйин ҳақида қандай таассуротдасиз?
“Ҳаммага хайрли кеч. Биринчи бўлимда жамоамиз жуда кучли ҳаракат қилди ва энг яхши ўйинлардан бирини кўрсатди. Майдон оғир эди, бу эса табиийки, ҳаракатимизга таъсир қилди. Бир футболчимиз қизил карточка олганидан кейин ҳам ўйинни тўғри йўлга қўйишга ҳаракат қилдик. Биз “Қизилқум” ўз майдонида доим қаттиқ курашишини яхши биламиз ва тайёргарликни шу тарзда олиб боргандик. Энди эса тикланиб, “Бухоро”га қарши баҳсга жиддий тайёрланишимиз керак. Чунки бу ўйин ҳам биз учун финалга тенг аҳамият касб этади”, — деди мураббий.
— Қисқа оралиқдаги ўйинлар таъсир қиляптими?
“Албатта, бу ҳам ўз изини қолдиряпти. Футболчиларнинг тикланиш жараёнига таъсир қилади. Бир томондан сафарлар бор, иккинчи томондан ҳар тўртинчи кунда майдонга чиқишга тўғри келяпти. Масалан, тўрт кундан кейин “Бухоро” билан ўйнаймиз. Улар эса кеча ўйнашди. Лекин биз бу билан эътироз билдирмаймиз. “Бунёдкор” ПФЛ тақдим этаётган тақвимни ҳурмат қилади. Бироқ қисқа оралиқдаги учрашувлар жамоа услубига таъсир қилади. Биз эса ишни тўхтатмаймиз ва мавсумни кўтаринки кайфиятда якунлашни мақсад қилганмиз”, — деди Зейтуллаев.
— Яна нималар етишмади, деб ўйлайсиз?
“Фикримча, биз яхши ўйнадик. Ўйин асосан назоратимизда ўтди. Агар футболчимиз майдондан четлатилмаганида, эҳтимол яна гол урган бўлардик. Бироқ футбол шунинг учун футбол — хатолар ҳам, эҳтирослар ҳам унинг ажралмас қисми. Ўша вазиятда ўйинчимиз қўпол хатога йўл қўйди. Мен ҳам футболчи бўлганман ва бу каби ҳолат исталган спортчи билан содир бўлиши мумкинлигини яхши биламан”, — дея жавоб берди мураббий.
— “Бунёдкор” икки очко йўқотдими ёки бир очко олдими?
“Агар биринчи бўлимдаги имкониятларни ҳисобга олсак, икки очко йўқотдик, дейиш мумкин. Лекин иккинчи таймда ўн киши бўлиб қолганимиздан сўнг устунлик рақиб томонга ўта бошлади. “Қизилқум” жисмоний футбол кўрсатди, бир голи ҳисобга олинмади. Шу боис Навоийдан олинган бир очкони кичик ‘олтин’ деб баҳоласак ҳам бўлади. Ростини айтсам, биз бу ерга фақат ғалаба учун келгандик”, — деди Зейтуллаев.
— Янги қоида ҳақида фикрингиз?
“Эндиликда фақат сардор ҳакам билан гаплашиши мумкин. Бу янги қоидага мослашиш осон эмас. Чунки олдин бундай тартиб йўқ эди. Футбол эҳтиросли ўйин, баҳсли вазиятда кўпчилик ҳакамнинг олдига бориши табиий ҳол. Бироз вақт керак, секин-аста футболчилар ҳам бу тартибга ўрганишади. Биз ҳакамларни ҳурмат қиламиз ва улар билан тўғри ҳамкорлик қилишга интиламиз”, — дея таъкидлади мураббий.
Шу тариқа, “Бунёдкор” Навоийда жанговор дуранг қайд этди. Энди эса клубнинг асосий вазифаси — “Бухоро”га қарши навбатдаги муҳим баҳсга тайёргарлик кўриш ва мавсумни юқори кайфиятда якунлаш.
Манба: championat.asia
«Замин»ни Telegram’да ўқинг!
