Миланнинг машҳур клуби «Интер» ёзги трансферлар бозорида навбатдаги катта битимни амалга оширди. Жамоа Франциянинг «Ланс» клубида тўп суриб келаётган ёш ярим ҳимоячи Анди Диуф билан келишувга эришди. Расмий маълумотга кўра, мазкур трансфер «нераззуррилар»га 25 миллион еврога тушган.
Италия клуби 22 ёшли футболчи билан узоқ муддатли шартнома имзолади. Энди Диуф «Интер» шарафини камида 2030 йил ёзигача ҳимоя қилиши кутилмоқда. Бу эса миланликлар ёш истеъдодга катта ишонч билдирганидан дарак.
Анди Диуф ҳақида
Футболчи «Ланс» сафида 2023 йилдан буён тўп суриб келмоқда. Қисқа вақт ичида у жамоанинг асосий таркибидан мустаҳкам ўрин эгаллашга муваффақ бўлди. Фақат ўтган мавсумнинг ўзида Диуф 37 та расмий учрашувда майдонга тушиб, ўзининг универсал ўйини ва майдондаги ишчанлиги билан мураббийлар ҳамда мухлисларнинг ишончини қозонди.
«Интер» учун аҳамияти
Миланликлар учун ушбу трансфер келажакка қаратилган муҳим қадам сифатида баҳоланмоқда. Чунки ёш ярим ҳимоячи нафақат жамоанинг ўрта чизиғини кучайтиради, балки кейинги йилларда етакчилардан бирига айланиши мумкин. Муттахассислар таъкидлашича, Диуфнинг техник маҳорати, тезкорлиги ва тактик фикрлаши уни А Серия шароитига мос келадиган футболчига айлантиради.
Шу тариқа, «Интер» ўз сафини янада кучайтирди ва янги мавсум олдидан мухлислар учун катта умид уйғотди. Милан клуби Европа миқёсидаги юксак мақсадларига эришишда яна бир муҳим қадам ташлади.
«Замин»ни Telegram’да ўқинг!
