Лигалар кубоги ярим финали жонкуяр муҳитда кечди ва унда Лионель Месси яна бир бор жамоаси учун қаҳрамонга айланди. 38 ёшли аргентиналик юлдуз “Интер Майами” сафида майдонга қайтиб, дубль қайд этди ҳамда финалга йўлланмани таъминлади.
Месси аввалги икки учрашувни жароҳати сабабли ўтказиб юборганди. Бироқ “Орландо Сити”га қарши ўйинда у ўзига хос лидерлик сифатини яна намоён қилди. Дастлаб 77-дақиқада пенальтини аниқ ижро этиб, ҳисобни тенглаштирди. Кейин эса 88-дақиқада жамоаси учун ғалаба тўпини киритиб, мухлисларга қувонч улашди.
— Бу баҳсда майдонга тушишни қаттиқ истадим. “Лос-Анжелес”га қарши ўйиндан сўнг бироз ноқулайлик сезгандим, лекин “Орландо Сити”га қарши учрашувга жиддий тайёргарлик кўрдим. Чунки бу беллашувнинг аҳамияти ва рақибнинг кучини яхши билардим. Жорий мавсумда уларни икки марта мағлуб эта олмаган эдик. Биринчи бўлимда тезлигим етмади, аммо танаффусдан кейин ўзимни енгил ва эркин ҳис қилдим, — деди Месси “Inter Miami News Hub”га берган интервьюсида.
Шу тариқа, “Интер Майами” финалда “Лос-Анжелес” — “Сиэтл Саундерс” жуфтлиги ғолиби билан баҳс олиб боради. Мухлислар эса Мессининг янги рекорди ва ёрқин ўйинини интиқлик билан кутишмоқда.
«Замин»ни Telegram’да ўқинг!
