CAFA Nations Cup-2025 мусобақаси олдидан Туркманистон миллий терма жамоаси бош мураббийи Ровшан Мередов оммавий ахборот воситалари вакиллари билан суҳбатда жамоа режалари ва мақсадлари ҳақида тўхталиб ўтди.
— Барча рақибларга ҳурматимиз баланд, бироқ биз майдонда ўз ўйинимизни кўрсатишга интилмоқдамиз. Ҳозирги асосий мақсадимиз — Осиё кубогига йўлланмани қўлга киритиш, — деди Мередов.
Мураббий таъкидлашича, ФИФАнинг расмий кунлари ҳали бошланмагани учун жамоанинг барча етакчи футболчилари йиғинда иштирок этмаяпти. — Масалан, Мингазов ва Чариев ҳозирча биз билан эмас. Аммо мусобақа якунига қадар улар таркибга қўшилиши мумкин, — дея қўшимча қилди у.
Оммавий ахборот вакилларидан бири сўнгги йилларда туркманистонлик футболчилар Ўзбекистон Суперлигасида деярли тўп сурмаётгани ҳақида савол йўллади. Мередов бу масалага қуйидагича муносабат билдирди: — Бу савол менга эмас. Балки бу футболчилар ўз юртимизга кўпроқ керакдир. Туркманистон иқтидорли ёшларга бой мамлакат. Уларга тўғри йўл кўрсата олсак, катта натижаларга эришишимиз мумкин.
Мутахассис сўзларига кўра, жамоа учун CAFA мусобақаси нафақат тайёргарлик, балки футболчилар учун ўз салоҳиятини намоён қилиш майдони бўлиб хизмат қилади. Мухлислар эса туркманистонлик йигитлар қандай ўйин кўрсатишини қизиқиш билан кутмоқда.
«Замин»ни Telegram’да ўқинг!
