Тўрт кундан буён Болгария пойтахти София шаҳрида ўсмирлар ўртасидаги жаҳон чемпионати қизғин тарзда ўтмоқда. Беллашувлар қизғин жараёнларда кечаётган бир вақтда, Ўзбекистон терма жамоаси илк кунларданоқ юқори натижалар қайд этиб, мухлисларига катта қувонч улашмоқда.
Ортда қолган учинчи кун натижаларига кўра, дзюдочиларимиз медаллар умумий ҳисобида етакчиликни сақлаб қолишди. Мана шу вақтга қадар жамоамиз 6 та медални қўлга киритди. Улардан 4 таси олтин медал экани алоҳида эътиборга лойиқ. Бу кўрсаткич билан Ўзбекистон спорт тарихи учун янги рекорд ўрнатилди.
Мусобақада иккинчи ўринни Халқаро дзюдо федерацияси (IJF) байроғи остида иштирок этаётган россиялик спортчилар эгаллаб турибди. Улар 3 та олтин ва 3 та бронза медали билан захирада. Дзюдо ватани Япония жамоаси эса 1 та олтин ва 2 та кумуш медал билан кучли учликдан жой олди.
Шунингдек, кучли ўнталик қаторида Бразилия, Қозоғистон, Мўғулистон, Сербия, Туркия, Грузия ва Белгия каби дзюдо мактаблари ҳам жой олди. Бу эса мусобақа даражасининг юқорилигидан дарак бермоқда.
Ўзбекистон дзюдо федерацияси тарқатган маълумотда таъкидланишича, ёш спортчиларимиз босқичма-босқич ўз маҳоратларини намойиш этиб, мамлакат шарафини муносиб ҳимоя қилмоқда. Муттахассислар фикрича, Софияда қайд этилган ушбу натижалар келгуси Олимпиада йўлида ёшларимиз учун катта тажриба ва янги имкониятлар эшигини очади.
