date

Пауло Бенту ҳақида баҳслар: Кападзе қоладими ёки янги мураббий келадими?

Пауло Бенту ҳақида баҳслар: Кападзе қоладими ёки янги мураббий келадими?

Куни кеча юртимизга португалиялик тажрибали мутахассис Пауло Бенту ташриф буюргани футбол жамоатчилигида катта муҳокамаларга сабаб бўлди. Айни пайтда барча назарлар Ўзбекистон миллий терма жамоасига қаратилган — чунки Бенту бош мураббий сифатида тайинланиши мумкинлиги ҳақида жиддий гап-сўзлар пайдо бўлди.

Бироқ, ҳозирда жамоага раҳбарлик қилиб келаётган Тимур Кападзенинг масаласи очиқлигича қолмоқда. ЎФА бу борада ҳали расмий баёнот бермагани вазиятни янада қизиқарли воқеага айлантирди.

Жаъфар Ирисметов мазкур мавзуга муносабат билдириб, ўз фикрлари билан ўртоқлашди.

— Нима ҳам дердик, Бентуни чақиришибди. Машарипов айтганидек, раҳбарият шу йўлни тўғри деб билса, демак уларча шу тўғри, — деди у. — Бироқ Кападзе масаласи ҳам кўтариляпти. Буни ЎФА раҳбарлари ҳал қилиши лозим.

Савол берилди: Кападзе ўзи ишини давом эттириши мақбулми ёки янги хорижлик юқори даражадаги мураббий керакми?

— Бу саволга мен эмас, балки ЎФА жавоб бериши керак. Фикрлар турлича: Кападзе қолгани яхшими ёки четдан мураббий келгани маъқулми, балки иккаласини уйғунлаштириш керакдир? Бу борада мутахассислар сўзи ҳал қилувчи бўлади, — деди Ирисметов.

Шу билан бирга, у агар хорижлик мураббий керак бўлса, кимни танлаши мумкинлиги ҳақида ҳам тўхталди:
— Агар танлаш имконияти бўлса, мен Юрген Клоппни танлардим. Чунки унинг иш услуби, жамоага руҳий куч бағишлай олиши жуда катта. Ҳар қанчаки ўзим Гвардиолани ҳам яхши кўрсам-да, Клоппга ўхшаган мураббий бизга катта туртки бериши мумкин.

Пауло Бенту ҳақидаги фикрлар ҳам турлича. Жаъфар Ирисметов қўшимча қилди:
— Бенту обрўли мураббий. Лекин БААда катта маблағ бўлишига қарамай, у ерда ҳам катта натижа кўрсата олмади. Бир йил ичида катта ўзгариш қилиш қийин. Вақт берилса, унинг имкониятларини кўриш мумкин. Жаҳон чемпионатига эса бир йилдан кам вақт қолди, шу боис айни пайтда унинг ишини баҳолаш оғир. Аввало футболчиларни ўрганиши учун ҳам вақт талаб этилади.

Мутахассислар таъкидлашича, яқин кунларда ЎФАнинг расмий қарори вазиятга ойдинлик киритади. Мухлислар эса миллий жамоа бошида ким қолиши ёки келиши ҳақида катта қизиқиш билан кутмоқда.


Манба: Sports.uz

Ctrl
Enter
Хато топдИнгизми
Иборани ажратиб Ctrl+Enter тугмасини босинг
Янгиликлар » Спорт » Пауло Бенту ҳақида баҳслар: Кападзе қоладими ёки янги мураббий келадими?