Германиянинг машҳур клубларидан бири ҳисобланган «Байер» Леверкузенда катта ўзгаришлар юз берди. Жамоа сентябрь ойининг биринчи кунида бош мураббий Эрик тен Хаг билан ҳамкорликни тугатди. Нидерландиялик мутахассис Бундеслигада бор-йўғи икки турдан кейин ишдан кетиши билан антирекорд ўрнатди.
Клуб раҳбарияти шошилинч равишда янги бош мураббий қидириш жараёнига киришди. Sky Germany нашри тарқатган хабарларга кўра, номзодлар орасида испаниялик Хави ҳам бор. 45 ёшли мутахассис айни пайтда ишсиз бўлиб турибди ва эркин ҳолда клуб билан музокара олиб бориши мумкин.
Эслатиб ўтамиз, Хави 2023/2024 йилги мавсум якунида ўзининг таркибий жамоаси «Барселона» билан хайрлашган эди. Унинг катта тажрибаси ва «блауграна»даги ютуқлари сабабли кўплаб клублар унинг хизматларига қизиқиш билдирмоқда.
«Байер» учун мавсумнинг илк икки учрашуви омадсиз бошланди. Аввало, ўз майдонида «Хоффенхайм»га 1:2 ҳисобида мағлуб бўлишди. Кейин эса сафарда Бременнинг «Вердер» жамоаси билан 3:3 ҳисобида дуранг қайд этишди.
Бу натижалардан сўнг мухлислар ва спорт нашрлари жамоанинг келажаги ҳақида жиддий саволлар қўйишди. Маҳаллий оммавий ахборот воситалари «Байер»га янги нафас кераклигини таъкидлаб, Хавининг келиши катта бурилиш бўлиши мумкинлигини ёзмоқда.
«Замин»ни Telegram’да ўқинг!
