Маълумки, 4–14 сентябрь кунлари Англиянинг Ливерпуль шаҳри катталар ўртасида илк бор ўтказилаётган Жаҳон чемпионатига мезбонлик қилмоқда. Нуфузли мусобақа World Boxing ташаббуси ва ҳомийлигида ташкил этилмоқда.
Дунё биринчилигида 60 та мамлакатдан 500 нафардан зиёд маҳоратли спортчилар иштирок этади. Мусобақа старт олган бугунги кунданоқ рингда жиддий тўқнашувлар кутилмоқда.
Биринчи кун баҳсларида Ўзбекистон шарафини атиги битта боксчи — Нигина Ўктамова ҳимоя қилади. У -54 кг вазн тоифасида Қозоғистон спортчиси Элина Базаровага қарши рингга кўтарилади.
Ташкилотчилар маълумотига кўра, жанглар Тошкент вақти билан икки дастурда ўтказилади: кундузи соат 15:00 да, кечки дастур эса 22:00 да бошланади. Ўктамованинг жангга чиқиши 22:15 га режалаштирилган.
Эслатиб ўтамиз, катталар ўртасидаги ушбу жаҳон чемпионати биринчи марта ўтказилаётгани билан ҳам тарихий аҳамиятга эга. Мазкур мусобақада ўзбек бокс мактабининг ёш ва иқтидорли вакиллари ҳам юқори натижалар кўрсатиши кутилмоқда.
«Замин»ни Telegram’да ўқинг!
