ФИФА маълумотларига кўра, 2026 йилги Жаҳон чемпионати чипталарини сотиб олишнинг дастлабки босқичида динамик нархлаш тизими қўлланилади. Бу дегани, мухлислар чипталарни бозордаги талаб ва таклифга қараб турли нархларда харид қилишлари мумкин бўлади.
10 сентябрдан бошланиб, 19 сентябрга қадар давом этадиган биринчи олди-сотди жараёнида VISA картаси эгалари АҚШ, Канада ва Мексика мезбонлигида ўтадиган мундиал баҳсларига чипта олиш имкониятига эга бўлади.
ФИФАнинг расмий баёнотида айтилишича, гуруҳ босқичи ўйинларига чипталар 60 доллардан бошланади. Бироқ плей-офф ва ҳал қилувчи босқичларда, айниқса финалда нархлар кескин кўтарилади ва улар 6730 долларгача етиши мумкин.
ФИФА чипталар ва меҳмондўстлик департаменти раҳбари Фальк Эллернинг таъкидлашича, сотувнинг биринчи босқичи учун тахминан 1 миллионга яқин чипта тайёрланган. Шу билан бирга, у динамик нархлар талабга қараб ўзгариши мумкинлигини қайд этди.
Бундай усул кўпинча авиабилетлар ва меҳмонхоналарда байрам мавсумлари ёки катта тадбирлар пайтида қўлланилади. Энди эса у Жаҳон чемпионати каби йирик спорт мусобақаларида ҳам кенг жорий этилмоқда.
Шу тариқа, ЖЧ-2026 финал учрашувига боришни режалаштираётган мухлислар учун чипта нархи анчагина қимматга тушиши мумкин.
«Замин»ни Telegram’да ўқинг!
