ФИФА кунлари ортда қолиб, яна миллий чемпионат баҳсларига эътибор қаратиш вақти етди. Бугундан бошлаб Суперлиганинг 21-тур учрашувлари старт олади. Аммо бу сафар тур доимгидек 8 эмас, балки 7 жуфтликдан иборат бўлади. Сабаби, Самарқандда ўтказилиши керак бўлган “Динамо” — “Андижон” ўйини 15 ноябрга қолдирилди.
10 сентябрь
19:00. “Насаф” — “Бухоро”
Қарши шаҳридаги баҳс турнинг очилишига айланади. Амалдаги чемпион ва ҳозирда якка пешқадам бўлиб турган “Насаф” пастки поғонада қолмаслик учун курашаётган “Бухоро”ни қабул қилади. Иккала жамоа мутлақо турлича мақсад учун майдонга тушаётгани билан ўйин қизиқ кечиши кутилмоқда. Фаворит сифатида “Насаф” кўрилади, “Бухоро” эса қарши ҳужум орқали имконият излайди.
11 сентябрь
18:30. “Машъал” — “Шўртан”
Қўшни жамоалар тўқнашуви — ҳақиқий воҳа дербиси. “Шўртан” чемпионатда сўнгги ўринда экан, ҳар қандай очко улар учун катта аҳамиятга эга. “Машъал” эса уй ўйинларини ҳозирча Ғузорда, яъни рақибининг стадионида ўтказмоқда. Шу боис ғузорликлар ўз уйида “меҳмон” сифатида майдонга чиқишади.
12 сентябрь
18:30. “Сўғдиёна” — ОКМК
Жиззахдаги беллашув доимо муросасиз кечиши билан машҳур. Иван Бошкович ва Миржалол Қосимов бир-бирини яхши танийдиган мураббийлар. Иккинчи даврада таркибини кучайтирган “Сўғдиёна” бу сафар олдинги рақибини қийнаши мумкин.
19:30. “Навбаҳор” — “Сурхон”
Намангандаги тўқнашувда Сергей Лушчан шогирдлари “Сурхон”ни қабул қилади. Ҳар икки жамоа ҳам ғалаба излайди, аммо дуранг эҳтимоли ҳам юқори.
13 сентябрь
18:00. “Қўқон-1912” — “Қизилқум”
Қўқондаги баҳсда мезбонларга осон кечмаслиги аниқ. “Қизилқум” Акмал Рустамов қўл остида сўнгги 9 турда мағлубиятсиз серияни давом эттирмоқда: 6 дуранг ва 3 ғалаба. Улар ФИФА кунларидаги танаффусдан қандай чиққанини айнан шу учрашув кўрсатади.
19:00. “Пахтакор” — “Нефтчи”
Турнинг энг марказий ўйини пойтахтда ўтади. Азалий рақиблар — “Пахтакор” ва “Нефтчи” тўқнашуви ҳақиқий “ўзбек классикоси” сифатида катта қизиқиш уйғотмоқда. Ҳар икки клуб чемпионлик учун курашаётган пайтда, мағлубият улар учун жуда оғир бўлади. Фарғонадаги илк ўйинда “Пахтакор” 0:4 ҳисобида йирик ғалабага эришгани барчанинг ёдида.
14 сентябрь
18:00. “Бунёдкор” — “Хоразм”
Илёс Зейтуллаев жамоаси Ҳаким Фузайлов бошқараётган “Хоразм”ни қабул қилади. Меҳмонлар етакчиларга қарши ўзини яхши кўрсатиб келмоқда. Бу сафар ҳам фаворитга осон кечмаслиги мумкин.
Шу тариқа, 21-турнинг асосий эътибори Тошкентдаги “Пахтакор” — “Нефтчи” баҳсига қаратилади. Бошқа учрашувларда эса пастки ва ўрта поғоналар учун жиддий курашлар давом этади.
