ФИФА кунлари ортда қолгани билан, Тожикистон футбол ҳаётида кутилмаган воқеа юз берди. Мамлакатнинг асосий миллий жамоаси ҳам, U-23 ёшлар терма жамоаси ҳам бош мураббийсиз қолди. Бу ҳақда Тожикистон футбол федерацияси расман маълум қилди.
Маълумки, сўнгги ойларда икки терма жамоа ҳам ўйинларда омадсиз иштирок этди. Асосий терма жамоа CAFA Nations Cup-2025 мусобақасида гуруҳ босқичидан чиқолмай қолди. Ёшлардан иборат U-23 жамоа эса Осиё Кубоги саралаш баҳсларида талабга жавоб бера олмай, асосий босқичга йўлланмани қўлга кирита олмади.
Айнан шу натижалар сабабли, асосий жамоа бош мураббийи Гела Шекиладзе ҳамда U-23 терма жамоаси устози Леван Хомерики лавозимларидан четлатилди. Федерация қарорини кенг жамоатчиликка эълон қилди ва яқин орада янги номзодлар ҳақида хабар беришини маълум қилди.
Тожикистон футболи сўнгги йилларда маълум даражада ривожланиш босқичини ўтгани билан, бу йилги муваффақиятсизлик кўплаб мухлисларни ранжитди. Терма жамоаларнинг истиқболини таъминлаш учун кучли ва тажрибали мураббий олиб келиш масаласи кун тартибида тургани айтилмоқда.
Шу тариқа, тожик футболи олдида янги давр бошланиши мумкин. Янги мураббийлар танлови ва уларнинг дастурлари жамоалар келажагига катта таъсир кўрсатиши шубҳасиз. Мухлислар эса ўз терма жамоаларини яна йирик мусобақаларда муносиб тарзда кўришга умид қилаётир.
«Замин»ни Telegram’да ўқинг!
