Нуфузли "Goal" интернет нашри 2026 йилги Жаҳон чемпионатида ғолиблик учун асосий даъвогарлар рўйхатини тақдим этди. Маълумки, ҳозирга қадар мундиалга 18 та терма жамоа йўлланмани қўлга киритган бўлса, қолган 30 та йўлланма учун кескин кураш давом этмоқда.
Муаллифлар рейтингда нафақат мундиалга йўлланма олган, балки саралаш босқичини муваффақиятли ўтказишига шубҳа йўқ бўлган кучли терма жамоаларни ҳам инобатга олишди.
Баҳолаш натижасига кўра, "Goal" турнирнинг бош фаворити сифатида Европа чемпиони — Испания терма жамоасини кўрсатмоқда. Нашр фикрича: "Испания Евро-2024да ажойиб натижаларга эришди, аммо 2026 йилги мундиалда улар янада кучлироқ ўйин кўрсатишлари мумкин."
Иккинчи ўринда амалдаги жаҳон чемпиони, Лионель Месси етакчилик қилаётган Аргентина жамоаси қайд этилган. Бу жамоа ўзининг барқарор ўйини ва тажрибали футболчилари билан яна титул учун жиддий кураш олиб бориши кутилмоқда.
Кучли учликни эса 1966 йилда Жаҳон чемпионлигини қўлга киритган Англия терма жамоаси якунлади. Англия сўнгги йиллардаги янги авлод футболчилари билан катта мақсадларга интилаётгани таъкидланмоқда.
Шунингдек, кейинги ўринларда Португалия, Франция, Германия, Нидерландия, Бразилия, Марокаш ва Эквадор каби жамоалар жой олди. Улар ҳам мундиалда кучли рақобат кўрсатиши кутилмоқда.
«Замин»ни Telegram’да ўқинг!
