«Манчестер Сити» ҳимоя чизиғини янада кучайтириш мақсадида «Кристал Пэлас»нинг марказий ҳимоячиси Марк Гуэҳини ўз сафига қўшишни мўлжаллаяпти. Бу ҳақда британиялик машҳур нашр — «The Sun» маълумот тарқатди.
Манбаларга кўра, «шаҳарликлар» келаси мавсумда эркин агент мақомига эга бўлиши мумкин бўлган футболчини олиш учун «Ливерпуль» билан жиддий рақобатга киришишга ҳозир. Гвардиола жамоасидаги мутахассислар 25 ёшли ҳимоячининг салоҳиятини юқори баҳолаб, унинг ўйини «Сити»нинг услубига тўлиқ мос келишига ишонмоқда.
Эслатиб ўтиш керак, Гуэҳининг «Кристал Пэлас» билан амалдаги шартномаси 2026 йил ёзига қадар амал қилади. Шу билан бирга, «Transfermarkt» порталида унинг бозор қиймати 45 миллион еврога тенг этиб кўрсатилган.
Англия терма жамоаси аъзоси ҳисобланган Марк Гуэҳи Премьер-лигадаги барқарор ўйини ва катта тажрибаси билан ажралиб туради. Шунинг учун унинг трансфери учун йирик клублар ўртасида кескин кураш бўлиши кутилмоқда.
Агар «Манчестер Сити» мазкур футболчини ўз сафига қўша олса, ҳимоя чизиғида рақобат янада кучайиб, жамоанинг узоқ мавсумдаги мақсадларига эришишда катта ёрдам бериши мумкин.
“Zamin”ни Telegram'да ўқинг!
