Александр Хомяков «Бухоро»нинг янги бош мураббийи сифатида иш бошлади

«Бухоро» клуби расмий матбуот хизмати маълумот тарқатди: жамоа раҳбарияти бош мураббийлик вазифасини россиялик мутахассис Александр Хомяковга топширди.

Клуб баёнотида айтилишича, янги мураббийнинг футболдаги кўп йиллик тажрибаси ва билимлари жамоага янги марраларни эгаллашда ёрдам беришига ишонч билдирилган. «Биз олдинда турган масъулиятли баҳслар, жиддий синовлар ва мухлислар кутаётган муҳим ғалабаларга тайёрланаяпмиз», — дейилади хабарда.

Шу билан бирга, Хомяковнинг «Бухоро» билан қанча муддатга шартнома имзолаганлиги ёки келишув тафсилотлари ҳақида ҳозирча маълумот берилмади.

Маълумки, ўтган ой клубда бош мураббийликни Улуғбек Бакаев тарк этган эди. Шу вақтга қадар жамоани вақтинчалик равишда Виктор Карпенко бошқариб келди. Энди эса «Бухоро» янги саҳифани Александр Хомяков қўл остида бошлайди.

Мухлислар учун энг қизиқ жиҳати — янги мураббий жамоанинг имкониятларини қай даражада очиши ва натижаларни қай йўналишга буриши. «Бухоро» футболчилари олдида энди янги мақсадлар ва кутилган ғалабалар турибди.

Шухрат Раззаков

«ЗАМИН.УЗ» муҳаррири