Хабарингиз бор, Англия Премьер-лигасининг дастлабки тўрт турида «Ливерпуль» йўқотишсиз ҳаракат қилди ва барча беллашувларда максимал очколарни жамғарди. Жамоанинг бош мураббийи Арне Слот бу ҳақдаги таассуротларини билдириб ўтди.
Нидерландиялик мутахассис ёзги трансферлар даврида таркибда юз берган катта ўзгаришларни эътиборга олиб, бундан ёмонроқ натижаларни кутганини яширмади:
— Ростини айтсам, биз кутганимиздан ҳам анча юқори кўрсаткичга эришдик. Ҳамма яхши билади, бу ёзда жамоада сезиларли ўзгаришлар бўлди. Шундай бўлса-да, Премьер-лига каби қийин чемпионатда тўртта учрашувда 12 очко тўплаш — бу ҳақиқатан ҳам жуда катта ютуқ. Очиғи, таркибдаги ўзгаришлардан кейин вазият бундан ёмонроқ бўлиши мумкин, деб ўйлагандим, — дея таъкидлади Слот.
Эндиликда мерсисайдликларни янада жиддий синов кутяпти. Бугун, чоршанба куни Чемпионлар Лигаси гуруҳ босқичининг илк турида «Ливерпуль» ўз майдонида кучли рақиб — «Атлетико Мадрид»ни қабул қилади.
Мухлислар эса жамоанинг ёрқин стартдан кейин Европа саҳнасида қандай ҳаракат қилиши билан қизиқмоқда.
