Жаҳон футболи тарихида энг кўп тўп урган юлдуз Криштиану Роналду ўтган ёзда “Ан-Наср” билан амалдагӣ шартномасини узайтирганида, клуб трансфер сиёсатида иштирок этиш ҳуқуқини ҳам қўлга киритганди. Шу пайтдан бошлаб португалиялик афсона клуб атрофига Европада танилган футболчиларни йиғишга жиддий ёндошмоқда.
Мисол учун, тўпурарлик маҳорати билан танилган Жоау Феликс ва Франция чемпиони Кингсли Коман айнан Роналдунинг шахсий аралашуви орқали Ар-Риёд клубига қўшилишни маъқуллагани айтилади. “Ан-Наср” раҳбарияти ҳам Криштианунинг таъсири билан жамоага янги юлдузларни жалб қилишдан мамнун.
Нуфузли fichajes.net сайти ёзганидек, энди клуб назарини “Манчестер Сити” юлдузи Фил Фоденга қаратди. Саудия клуби 25 ёшли инглиз футболчиси учун 130 миллион евро таклиф этмоқда.
Фоденнинг “шаҳарликлар” таркибидаги аҳамияти беқиёс. Клуб тарбияланувчиси бўлган ҳужумкор футболчи мухлислар билан доимий алоқада ва уларнинг кўнглида алоҳида ўринга эга. Хосеп Гвардиола ҳам унинг иқтидорини баланд баҳолайди ва жамоанинг энг муҳим футболчиларидан бири сифатида кўради. Бироқ, таклиф қилинаётган улкан маблағ “Сити” раҳбарияти қарорини ўзгартириши эҳтимолдан холи эмас.
Саудия клубининг режаси катта: Роналдуни марказга қўйган ҳолда ёш, тезкор, бақувват ва Европада тажриба орттирган юлдузларни жамоага тўплаш. Фоден эса айнан шу талабларга мос келади. У Англия Премьер-лигасида тарбия топган, Чемпионлар лигаси ғолиби бўлган ва миллий терма жамоанинг етакчиларидан бири саналади.
Бироқ айрим экспертлар “Манчестер Сити” клуб тарбияланувчисини қўйиб юборишига ишонмайди. Чунки Фоден клуб академияси ва асосий таркиб ўртасидаги кучли кўприк ҳисобланади. Шу билан бирга, “Ан-Наср” томонидан таклиф этилаётган мисли кўрилмаган маош футболчи қарорини ўзгартириши мумкинлиги ҳам қайд этилади.
Айни вақтда Гвардиола таркибда авлодлар алмашинувини амалга оширмоқда. Ёши катта футболчилар жамоани тарк этаётгани сари янги ижрочиларга йўл очилмоқда. Январ ойида “Ланс”дан олиб келинган Абдуқодир Ҳусанов ҳимоя чизиғида рақобат катталигига қарамасдан асосий таркиб футболчисига айланиб бораётгани ҳам шу жараённинг яққол исботи.
Шундай экан, “Ан-Наср”нинг қимматбаҳо режаси амалга ошадими ёки “Сити” ўз юлдузини сақлаб қоладими — буни вақт кўрсатади. Бир нарса аниқ: Роналдунинг саъй-ҳаракатлари клуб трансфер сиёсатида янги саҳифа очиб берди.
