"Барселона" бош мураббийи Ҳанси Флик охирги баёнотларида жамоага янги қўшилган ҳужумчи Маркус Рэшфорд трансфери ортида унинг шахсан ўзи турганини очиқлаштирди. Мураббийнинг сўзларига кўра, у ёзги трансфер ойнасида жамоа спорт директори Деку билан мулоқотда бўлиб, айнан шу футболчини олиб келишни қаттиқ талаб қилган.
“Ёзда Декуга мурожаат қилиб: ‘Менга Маркус Рэшфордга ўхшаган футболчи зарур. Илтимос, уни олиб келинг!’ деган эдим. Ва бугун у “Камп Ноу”да экани мен учун катта хурсандчилик”, — деди Флик.
Тажрибали мураббийнинг айтишича, Рэшфорд трансфер бозорида камдан-кам учрайдиган имконият бўлган ва "Барселона" бундай имкониятдан унумли фойдаланиши шарт эди. “Мен у билан шахсан суҳбатлашдим ва жамоада сенга ишонч борлигини айтдим. Бу унинг учун ҳам катта қадам, чунки янги муҳитда ўзини кўрсатиш имкониятига эга бўлади”, — дея қўшимча қилди мураббий.
Маркус Рэшфорднинг "Барселона" сафидаги илк қадамлари мухлисларни ҳайратда қолдирди. Чемпионлар лигасининг 1-туридан ўрин олган "Ньюкасл"га қарши ўйинда инглиз ҳужумчиси иккита гол муаллифига айланиб, жамоасига муҳим ғалаба тақдим этди. Бу натижа унинг трансфери тўғри қарор бўлганини яна бир бор тасдиқлади.
“Рэшфордга ишонишимиз унинг майдондаги ҳаракатларида ҳам кўриниб турибди. У нафақат гол уради, балки жамоавий ўйинга ҳам катта ҳисса қўшмоқда. Бизда ҳозир жуда кучли ҳужум чизиғи бор ва у бу тизимда асосий шахслардан бирига айланиши аниқ”, — деди Флик.
Футбол мухлислари ҳам ижтимоий тармоқларда Рэшфорднинг илк ўйинини юқори баҳолаб, уни “Барселона”нинг янги юлдузи сифатида тилга олишмоқда. Таъкидланишича, ҳужумчи тезкорлиги, майдондаги фаоллиги ва гол уриш қобилияти билан Испанияда ҳам ўзини намойиш қилиб, мухлисларнинг қалбини забт этмоқда.
Эслатиб ўтамиз, Маркус Рэшфорд "Манчестер Юнайтед" тарбияланувчиси бўлиб, бу клуб сафида Европада энг иқтидорли ҳужумчилардан бири сифатида танилган. Ундан кутилган ишончни энди "Барселона" сафида ҳам оқлаши лозим.
Фликнинг таъкидлашича, Рэшфорд трансфери нафақат жамоа тактикаси, балки клубнинг келажак режалари учун ҳам муҳим аҳамиятга эга. “Биз ундан узоқ муддатли лойиҳамизда асосий ўрин тутишини кутмоқдамиз”, — дея сўзини якунлади бош мураббий.
«Замин»ни Telegram’да ўқинг!
