Россиялик ММА жангчиси Арман Царукян UFCнинг енгил вазн чемпиони Илия Топурия ҳақида ўз фикрларини билдирди. Унинг таъкидлашича, Топурия ташкилотда узоқ вақт чемпионлик мақомини сақлаб қолиши қийин.
“Мен учун асосий вазифа — UFC кимни рақиб қилиб қўйса, ўша билан жанг қилиш. Камаргача йўлда ким тўғри келса, барчаси билан тўқнашишга тайёрман. Аммо фикримча, Илия Топурия узоққа бормайди. У катта пул ва катта шоу жангларини истаяпти. Масалан, у боксга ўтиб, Теренс Кроуфордга қарши жанг қилиш ҳақида ўйлаяпти. Шу сабабдан у эҳтимол бир марта камарини ҳимоя қилади ва кейин ундан воз кечиши мумкин”, — деди Царукян “Матч ТВ”га берган интервьюсида.
Шу билан бирга, Царукян яқин вақт ичида Ислом Махачев билан жанг бўлиши катта эҳтимол эмаслигини ҳам таъкидлаб ўтди. Унинг сўзларига кўра, Топуриянинг чемпионлик мавқеи UFC учун молиявий ва шоу жиҳатдан қизиқ, аммо у ўз мақсадини тез орада ўзгартириши мумкин.
ММА жамоатчилиги орасида ҳам Топуриянинг келажаги ҳақида турли фикрлар билдирилмоқда. Айримлар унинг техник жиҳатдан кучлилигини таъкидласа, бошқалар унинг молиявий манфаатлар ортидан кетиши уни UFCдан узоқлаштириши мумкинлигини айтишмоқда.
«Замин»ни Telegram’да ўқинг!
