«Ливерпул»нинг яримҳимоячиси, аргентиналик Алексис Макаллистер машҳур футбол юлдузлари Лионел Месси ва Криштиану Роналду ўртасидаги кўп йиллик баҳсга ўз муносабатини билдирди. Унинг фикрича, жаҳон чемпионатида Аргентина терма жамоасининг қўлга киритган ғалабаси бу тортишувни амалан якунлаган.
Журналистнинг “Сизнингча, Аргентина жаҳон чемпионатида ғолиб чиққани Роналду ва Месси рақобатига нуқта қўйдими?” деган саволига футболчи қуйидагича жавоб берди:
“Менимча, бу масала ҳақида илгари ҳам катта баҳс бўлиши шарт эмасди. Лекин мен аргентиналикман ва табиий равишда Мессининг устунлигини айтаман. Криштиану Роналдуни жуда ҳурмат қиламан, уни дунёнинг иккинчи энг яхши футболчиси сифатида кўраман. Унинг футболига, интизомига ва маҳорат даражасига ҳеч қандай шубҳа йўқ. Аммо шахсан мен учун Лионел Месси тарихдаги энг зўри. Унга тенг келадиган футболчи ҳеч қачон пайдо бўлмас деб ҳисоблайман”, — деди Макаллистер.
Футболчи сўзларига кўра, Месси нафақат Аргентина, балки бутун дунё футболининг рамзига айланган. Унинг майдондаги ҳаракатлари, карьера давомида қўлга киритган совринлари ва шахсий сифати уни бошқалардан ажратиб туради.
Шу билан бирга, Макаллистер Роналдунинг футболдаги улкан ҳиссасини ҳам алоҳида таъкидлаб, “Роналдуга ҳурматсизлик қилиш ниятим йўқ, у ҳам футбол тарихида ўчмас из қолдирган” дея қўшимча қилди.
«Замин»ни Telegram’да ўқинг!
