Бундеслиганинг 5-турида Мюнхеннинг машҳур “Бавария” клуби ўз майдонида “Вердер” жамоасига қарши йирик ва ишончли 4:0 ҳисобида ғалаба қозонди. Бу беллашув нафақат мюнхенликлар учун, балки жамоа ҳужумчиси Харри Кейн учун ҳам тарихий аҳамиятга эга бўлди.
Учрашувда инглиз форварди жамоаси таркибида дубл муаллифига айланиб, Европа “Топ-5” лигаларида бир клуб сафида энг тезкор равишда 100 та гол урган футболчи сифатида тарихга кирди. Бу рекорд футбол оламида катта қизиқиш уйғотди.
Маълумотларга кўра, Кейн атиги 104 та расмий ўйинда 100 та гол урди. Ундан аввал Криштиану Роналду “Реал Мадрид”да ва Эрлинг Холанд “Манчестер Сити”да шу кўрсаткичга эришиш учун 105 та баҳсда иштирок этганди. Шу тариқа, Кейн улардан бир қадам олдинга ўтиб, янги рекордни белгилади.
Эътиборли жиҳати шундаки, англиялик ҳужумчи Германия чемпионатидаги 68 та беллашувда 72 та гол киритган. Бу кўрсаткич уни Бундеслига тарихидаги энг самарали футболчилардан бири сифатида намоён қилмоқда.
Футбол мутахассислари ва мухлислар Кейннинг бу рекордини юксак баҳолаб, унинг кейинги мавсумларда ҳам янада кўп ютуқларга эришишига ишонч билдиришмоқда.
«Замин»ни Telegram’да ўқинг!
