“Барселона” бош мураббийи Ханс-Дитер Флик жамоа мухлислари учун кутилган янгиликни маълум қилди. Унинг таъкидлашича, жамоа ярим ҳимоячиси ва Испания футболи умиди сифатида кўрилаётган Ламин Ямал тез орада майдонга қайтиши мумкин.
Флик матбуот анжуманида Ямалнинг ҳолати ҳақида тўхталиб: “Биз унинг “Реал Сосьедад”га қарши учрашувда жамоа ихтиёрида бўлишидан мамнунмиз. Агар у захирада ўтирса, бу унинг ҳар дақиқада майдонга тушишга тайёрлигидан далолатдир”, – деди.
Эслатиб ўтамиз, 18 ёшли ёш истеъдод сўнгги бор 2025 йилнинг 31 август куни “Райо Вальекано”га қарши баҳсда иштирок этган эди. Ушбу учрашувдан сўнг олинган жароҳат сабабли бир қатор муҳим ўйинларни ўтказиб юборди. Бу пайтда “Барселона” ҳам бир нечта муҳим очколарни йўқотди ва мухлислар Ямалнинг майдонга қайтиши жамоа учун янги куч бўлишини кутиб қолишди.
“Барселона” учун Ламин Ямал нафақат ёш иқтидор, балки ҳужумда янги нафас сифатида кўрилади. Унинг техникаси, майдондаги тезкор қарорлари ва рақиб ҳимоясини ёриб ўтиш маҳорати бугунги жамоа учун жуда муҳим.
Каталония клуби 28 сентябрь куни Испания чемпионати доирасида сафарда “Реал Сосьедад” билан куч синашади. Айнан шу баҳс Ямалнинг тикланишидан кейинги илк учрашуви бўлиши мумкин. Мухлислар эса ёш юлдуздан яна ўзининг ҳайратланарли ўйинини кутмоқда.
Шубҳасиз, Ламин Ямалнинг сафга қайтиши “Барселона” учун катта қўллов бўлади. Бу нафақат жамоа, балки бутун Ла Лига мухлислари учун ҳам қизиқарли воқеа саналади.
