“Манчестер Сити” таркиби ҳозирча ҳеч кимга енгиллик бермайдиган даражада қудратли. 2026 йил АҚШ-Канада-Мексикадаги жаҳон чемпионатига йўл олмоқчи бўлган бир қатор юлдузлар ҳам шу дресс-румида. Абдуқодир Ҳусанов келганидан бошланган авлодлар алмашинуви эса ички рақобатни янада қизитиб юборди.
Шу рақобат туфайли айрим футболчилар клубда мунтазам дақиқа ололмаяпти. Бу эса уларнинг терма жамоадаги мақомига ҳам таъсир қилиши турган гап. Энг ёрқин мисол — Натан Аке. Нидерландия термаси бош мураббийи Рональд Куман уни октябр йиғинига чақирди, бироқ очиқ талаб қўйди: “Клубда доимий ўйин амалиётисиз — термада жой йўқ”.
Демак, Аке январда катта қарор остонасида: қолиш ва ўзини қайта тиклашми ёки мунтазам майдонга тушиш учун янги манзилга йўл олишми?
Гвардиола ҳозир марказда кўпроқ Йошко Гвардиол — Рубен Диаш жуфтлигига ишоняпти. Уларнинг ортидан тажрибали Жон Стоунз ва сўнгги ойларда ўзини кўрсата олган Абдуқодир Ҳусанов навбат кутаяпти. Ҳусановнинг ишончли стартлари Акенинг “кўзга-кўринадиган дақиқа”ларини яна қисқартирди.
Акенинг иккинчи “паноҳ”и бўлган чап қанотда ҳам тирбандлик: ёзда келган Райан Айт-Нури ва академия маҳсули Нико О’Райли асосий даъвогарлар сифатида кўрилмоқда. Натижада Натан жорий мавсумда бор-йўғи олтита ўйинда майдонга тушди, уларнинг кўпини захирадан.
Куман бунга аниқ баҳо берди: “Ўйин амалиёти — терма учун тайёргарликнинг ўзаги”. Бу ишора клублар бозорига ҳам етди: январда Аке учун таклифлар пайдо бўлиши сюрприз бўлмайди. Чунки у ҳали-ҳамон универсаллик (марказ/чап) ва тажриба билан қиммат.
Шу орада “Сити”да ёзги тозалаш бўлиб ўтди: Витор Рейс — “Жирона”га, Макс Аллейн — “Уотфорд”га, Мануэль Аканжи — “Интер”га ижарага кетди. Абдуқодир Ҳусанов ҳам ижара рўйхатида турганди, аммо Пеп режалари ўзгарди — ва у қолди. Қолиш билан бирга у марказдагина эмас, жамоа учун “оғриқ нуқта” бўлган ўнг қанотда ҳам ишончли ўйин кўрсатиб, мураббий ишончини оширди.
Хулоса равшан: “Сити”да палитра бой, рақобат муросасиз. Аке учун энг тўғри ечим — мунтазам ўйин амалиётини топиш. Бу “Этихад”да бўладими ёки янги манзилда — январ ойи жавобни беради. Терма жамоага борадиган йўл эса, ҳар ҳолда, дақиқалардан бошланади.
“Zamin”ни Telegram'да ўқинг!
