Африка қитъасидаги жаҳон чемпионати–2026 саралаш босқичи якунланди ва яна бир иштирокчи номи маълум бўлди. Гана миллий терма жамоаси сўнгги турда муҳим ғалаба қозониб, мундиалга чиқиш имконини қўлга киритди.
Беллашувда Гана Қуддус киритган гол орқали Қамар ороллари устидан минимал ҳисобда ғалаба қозонди. Бу натижа уларга Мадагаскар ва Малидан юқори поғонада туриш ҳамда гуруҳда биринчи ўринни эгаллаш имконини берди.
Шу тариқа, Гана ўз тарихида бешинчи марта жаҳон чемпионатида иштирок этадиган бўлди. Африкаликлар биринчи бор 2006 йилда мундиалда дебют қилган ва шундан бери фақат 2018 йилги мусобақани ўтказиб юборган.
Гананинг тарихдаги энг ёрқин натижаси — 2010 йилдаги ЖАРда ўтган мундиалда қайд этилган. Ўшанда жамоа чорак финалгача етиб борган ва дунё футболида катта таассурот қолдирган эди.
Маълумот учун, ҳозирча ЖЧ–2026 мусобақасига йўлланма олган 21 жамоа қуйидагича:
АҚШ, Канада, Мексика, Япония, Янги Зеландия, Эрон, Аргентина, Ўзбекистон, Жанубий Корея, Иордания, Австралия, Бразилия, Эквадор, Уругвай, Колумбия, Парагвай, Марокаш, Тунис, Миср, Жазоир ва энди Гана.
Таҳлилчилар фикрича, Гананинг қайтиши Африка учун катта ғалаба бўлди — жамоа яна бир бор қитъанинг номини жаҳон саҳнасида шараф билан ҳимоя қилиш имконига эга бўлди.
“Zamin”ни Telegram'да ўқинг!
