Хорватия терма жамоаси ва “Милан” клубининг тажрибали ярим ҳимоячиси Лука Модрич фаолияти якунлангач, ўзининг илк катта клуби бўлган “Реал Мадрид”га қайтади. Бу ҳақда испаниялик журналистларга таянган ҳолда DefensaCentral хабар тарқатди.
Манбаларнинг ёзишича, 40 ёшли футболчи фаолиятни тугатгач, “Лос-Бланкос” академиясида мураббий сифатида иш бошлаши режалаштирилган. Модричнинг “Реал” президенти Флорентино Перес билан яқин муносабатлари туфайли ушбу таклиф анча олдин муҳокама қилинган ва футболчи уни қабул қилган.
Маълум қилинишича, Модрич ҳозирнинг ўзида мураббийлик лицензиясини қўлга киритиш учун тайёргарлик кўришни бошламоқда. У бу мавсум якунигача махсус курсларда ўқишни режалаштирган ва шу орқали футболчиликдан мураббийликка босқичма-босқич ўтишни мақсад қилган.
“Милан” билан амалдаги шартнома 2026 йилнинг ёзигача мўлжалланган бўлиб, унда томонлар келишувни яна бир йилга узайтириш имкониятига ҳам эга. Аммо, инсайдерлар маълумотига кўра, хорват футболчиси ўзининг охирги профессионал мавсумини айнан Италия клуби сафида ўтказишни хоҳламоқда.
Лука Модрич карьераси давомида Европанинг энг юқори даражадаги футболчиларидан бири сифатида танилган. У 2018 йилда “Олтин тўп”ни қўлга киритиб, Роналду ва Месси ҳукмронлигига чек қўйган илк футболчи сифатида тарихга кирган эди.
Унинг мадридликлар сафидаги 10 йилдан ортиқ фаолияти давомида Модрич беш марта Чемпионлар лигаси, тўрт марта клублар ўртасидаги жаҳон чемпионати ва бир нечта ички титулларга эга чиқди. Шу боис, “Реал” раҳбарияти унинг тажрибасини ёш авлод учун катта мактаб сифатида кўришмоқда.
“Лука ҳар доим ақл билан ўйнаган, ҳар бир ҳаракатида тарбия ва профессионаллик кўринган. Биз унинг клубга қайтиши орқали ёшлар учун илҳом манбаи яратишни истаймиз”, — деган клубдаги манба DefensaCentral’га.
Модричнинг “Реал” академиясига қайтиши мадридликлар учун нафақат рамзий, балки стратегик аҳамиятга ҳам эга бўлади. Унинг етакчилик қобилияти ва тўп билан ишлаш маданияти ёш тарбияланувчилар учун амалдаги намунага айланиши кутилмоқда.
Ҳозирча футболчи “Милан” сафида мавсумни кучли якунлашни ва Италияда сўнгги марта катта саҳнада ўйнашни режалаштирмоқда. Шундан сўнг эса уни “Реал”нинг қимматли сафида янги — мураббийлик йўли кутмоқда.
“Zamin”ни Telegram'да ўқинг!
