Европа футболида яна катта сенсацияга сабаб бўладиган битим муҳокама қилинмоқда. Франциянинг етакчи клуби — «ПСЖ» «Барселона»нинг 18 ёшли истеъдодли вингери Ламин Ямални сотиб олиш имкониятини ўрганмоқда, деб ёзди Goal.com.
Маълумотларга кўра, парижликлар ёш испаниялик футболчи учун тарихдаги энг катта трансферни амалга оширишга тайёр. «Барселона» билан 2031 йилгача тузилган шартномага кўра, Ямалнинг товон пули 1 миллиард евро этиб белгиланган.
Шу билан бирга, ПСЖ 2017 йилда Неймар учун тўланган 222 миллион евролик жаҳон рекордини янгилайдиган таклиф тайёрламоқда. Манбаларнинг маълум қилишича, эҳтимолий битим 230 миллион евродан юқори бўлиши мумкин.
Париж клуби бу бўйича дастлабки музокараларни бошлаб юборган, бироқ ҳозирча «Барселона» расмий таклиф олмаганини маълум қилган. Шунга қарамасдан, трансфер ойнасида Ямалнинг номи Европадаги энг қизиқарли мавзулардан бирига айланди.
Ламин Ямал бу мавсумда «Барселона» сафида ёрқин ўйин намойиш этмоқда — у 5 та учрашувда майдонга тушиб, 2 гол урди ва 3 та голли узатма муаллифи бўлди. Мутахассислар уни келажакда дунё футболи юлдузларидан бири сифатида кўришмоқда.
ПСЖ учун Ямал — янги Неймар бўлиши мумкин. Француз клуби ёш вингер орқали янги маркетинг қиймати ва техник куч қўлга киритишни режалаштирмоқда. Шу билан бирга, Ямалнинг ўзи ҳам юқори даражадаги рақобат ва янги тажриба сари қизиқиши мумкинлиги айтилмоқда.
Агар келишув амалга ошса, бу футбол тарихидаги энг йирик ва шов-шувли трансферлардан бири сифатида ёдда қолиши аниқ.
“Zamin”ни Telegram'да ўқинг!
