“Манчестер Юнайтед” бош мураббийи Рубен Аморим Англия премьер-лигасида “Ливерпуль” устидан қўлга киритилган муҳим ғалабадан сўнг журналистлар билан бўлган суҳбатда жамоа ўйини ҳақида ўз фикрларини билдирди, деб хабар берди BBC Sport.
Аморимнинг таъкидлашича, бу ғалаба унинг клубдаги фаолиятидаги энг катта ва аҳамиятли натижа бўлган. Шу билан бирга, у футболчиларни ва мухлисларни ҳам табриклади.
«Менимча, бу “Манчестер Юнайтед”даги энг катта ғалабам бўлди. Бугунги натижа биз учун катта аҳамиятга эга, аммо эртага у орқада қолади. Бу уч очко бизга ишонч ва куч бағишлайди. Ҳар бир баҳсда курашяпмиз, фақат иккинчи бўлимларда баъзан ўз ўйинимиздан чиқиб кетаяпмиз. Лекин жамоада руҳ ва жон бор — бу энг муҳими», — деди мураббий.
Аморимнинг сўзларига кўра, жамоа ўйиндан олдин рақибни чуқур таҳлил қилган ва стандарт вазиятлар орқали ғалабага эришишни режалаштирган:
«Ўйинни чуқур таҳлил қилдик ва стандартлар бугунги баҳсда асосий қуролимиз бўлиши кераклигини англадик. Тажрибали ўйинчиларни майдонга туширдик. Прессингда фаол ҳаракат қилганимизда рақиб тўп йўқотишини сездик. Бу орқали ғалабага эришдик».
Мураббий шунингдек, жамоа етакчиси Ҳарри Магуайрнинг ўйинини ҳам алоҳида таъкидлади:
«Магуайр бугун жамоа учун катта иш қилди. У нафақат майдонда, балки кийимхонанинг ўзида ҳам етакчи бўлиши керак. У ўз тажрибаси билан ёшларга намуна бўлади», — деди Аморим.
Ғалабадан кейинги кайфият ҳақида гапирар экан, португалиялик мутахассис кулимсираб шундай деди:
«Футболчиларимнинг хурсанд бўлганини кўрсам, мен ҳам мамнун бўламан. Лекин улар кийимхонада қўйган мусиқани эшитиб, юрагим сиқилди — менинг мусиқадаги таъбим уларникидан анча яхши».
Аморим фикрича, “Ливерпуль” устидан қўлга киритилган бу ғалаба “Манчестер Юнайтед” учун янги босқични бошлаб бериши мумкин. Мураббий жамоа энди барча диққатни кейинги баҳс — “Брайтон”га қарши ўйинга қаратганини таъкидлади.
Шундай қилиб, Рубен Аморимнинг сўзларига кўра, “МЮ”даги бу ғалаба нафақат натижа жиҳатидан, балки жамоавий руҳ ва ишонч нуқтаи назаридан ҳам муҳим аҳамият касб этади.
“Zamin”ни Telegram'да ўқинг!
