“Ливерпуль” бош мураббийи Арне Слот жамоанинг кетма-кет тўрт учрашувда мағлуб бўлганидан кейин вазият ҳақида фикр билдирди, деб ёзди fapl.ru.
Голландиялик мутахассиснинг таъкидлашича, ҳар бир мураббий фаолияти давомида қийин паллаларни бошидан кечиради ва бу — табиий жараён.
«Мураббийликда синовларсиз бўлмайди. Фаолиятим бошиданоқ мен қийинчиликларга дуч келганман — илк бор клуб бошқарганимда ҳам, каттароқ жамоага ўтганимда ҳам, ҳатто Юрген Клоппнинг ўрнини эгаллаган пайтимда ҳам шундай бўлган.
Ҳозир эса биз кетма-кет тўртта баҳсда ютқаздик. Бу ҳам бир синов. Лекин мен жамоада ишонч йўқолди, деб ўйламайман. Ҳар бир ўйинда мағлуб бўлганимизда ҳам иккинчи бўлимда ажойиб имкониятлар яратдик. Агар шундай ўйнашда давом этсак ва айрим жиҳатларни яхшилай олсак, ғалабалар қайтишига барча асослар бор», — деди Арне Слот.
Слотнинг фикрича, “Ливерпуль” ҳозирги ҳолатда кучсиз эмас, балки қайта қурилиш босқичида. У жамоанинг тактик ва руҳий жиҳатдан барқарорликка эришиши учун вақт кераклигини таъкидлади.
Таҳлилчиларнинг айтишича, Слот жамоага ишонч билан ёндашмоқда ва унинг фикрлари “Ливерпуль” мухлисларига ҳам оз бўлсада, умид бағишлади.
Клуб кейинги турда ўз майдонида навбатдаги баҳсни ўтказади ва бу ўйин “қизиллар” учун вазиятни буриш имконияти сифатида кўрилмоқда.
