"Барселона" клуби бош мураббийи Ханс-Дитер Фликнинг Испания чемпионати доирасидаги "Реал"га қарши ўйинда иштирок этишини таъминлаш учун дисквалификацияни бекор қилишга ҳаракат қилмоқда. Каталонияликлар пайшанба куни Апелляция қўмитасига шикоят аризасини топширди.
Euro-football.ru маълумотига кўра, клуб ушбу масалада якуний қарорни кутмоқда. Флик ўтган дам олиш кунлари "Жирона"га қарши ўйинда қизил карточка олди.
Ҳакам уни иккинчи огоҳлантиришдан сўнг майдондан четлатди. Бунга сабаб мураббийнинг ҳакам қарорига норозилик билдиргани бўлди.
"Барселона" апелляциясида ҳакам протоколига киритилган ёзувлар видео тасвирга мос келмаслигини таъкидлаган. Аввалроқ интизомий қўмита каталонияликларнинг далилларини инобатга олмади ва Фликка дисквалификация жазосини қўллади.
Агар бу апелляция ҳам рад этилса, клуб Испания спорт маъмурий суди орқали мурожаат қилиш имконига эга. "Реал" ва "Барселона" ўртасидаги учрашув якшанба куни, 26 октябрда бўлиб ўтади.
