Transfermarkt портали Европанинг энг кучли бешта чемпионати клублари орасида энг яхши ҳимояга эга жамоалар рейтингини эълон қилди. Рейтингга Англия Премьер-лигаси, Германия Бундеслигаси, Испания Ла Лигаси, Франция 1-лигаси ва Италия А серияси клублари киритилган.
Лондоннинг “Арсенал” клуби рейтингда биринчи ўринни эгаллади. “Канонирлар” барча мусобақаларда ўтказган 12 расмий ўйинда атиги учта гол ўтказиб юборди. Ушбу голлардан фақат бири ўйиндан киритилган бўлиб, уни “Манчестер Сити” ҳужумчиси Эрлинг Ҳоланд урган.
“Арсенал” ҳар бир ўйинда ўртача 0,25 тадан гол ўтказган. Иккинчи ўринда “Милан” клуби қайд этилган.
Италияликлар рақибларидан тўртта гол ўтказиб юборган. Бироқ “Милан” ҳозиргача “Арсенал”га нисбатан камроқ, яъни тўққизта ўйин ўтказган ва бу мавсум Еврокубокларда иштирок этмаяпти.
Учинчи поғонани яна бир Италия клуби — “Рома” эгаллади. Римликлар тўққизта учрашувда бешта гол ўтказган.
Рейтингда тўртинчи ўринни “Комо” клуби банд этди, улар ҳам тўққиз ўйинда олтита гол ўтказиб юборган.
