Арсенал жамоаси вингери Букаё Сака жамоасининг жорий мавсумдаги имкониятлари ҳақида фикр билдирди. Премьер Лига чемпионлиги учун асосий даъвогарлар қаторида тилга олинаётган "канонирлар" ҳозирда жадвалда биринчи ўринда бориб, энг яқин таъқибчидан тўрт очко олдинда турибди.
"Агар сиз Арсенал футболчиси бўлсангиз, одамлар ҳар доим мавсумни қаерда якунлаётганингиз ёки ўйинингиз ҳақида гапиришади. Баʼзан бу таҳлиллар ортиқча бўлиб туюлади.
Аммо бу мавсумда ўзимизда кучли таркиб ва юқори сифатга эга футболчилар борлигини ҳис қиляпман. Биз кўплаб жароҳатлардан ўтдик, лекин майдонга чиққан ўйинчиларимиз барибир юқори даражада ўйнай олишларини кўрсатишди.
Бу бизга мавсумни охиригача олиб бориш учун айнан керак бўлган нарса. Ўйлайманки, аввалги мавсумларда позицияларимизни йўқотганмиз.
Аммо бу мавсумда бунга тайёрмиз, деб ҳисоблайман. Илгари "Ньюкасл" билан бўлган ўйиндаги каби баҳсларда яхши натижага эриша олмаган бўлсак, бу сафар 2:1 ҳисобида ғалаба қозондик.
Лекин ҳали "бу бизнинг йилимиз" деб айтиш учун эрта, деб ўйлайман. Сўнгги уч мавсумда биз чемпионлик учун курашдик, лекин ҳар сафар иккинчи ўринда қолдик.
Тажриба менга ўргатдики, кузда нима бўлишидан қатъи назар, апрелда чўққида бўлиш муҳим. Шундагина биз биринчи ўрин учун кураша оламиз," - деди Сака Sky Sports нашрига.
Арсенал охирги марта Англия чемпионлигини 2004 йилда қўлга киритган эди.
