Каталониянинг машҳур клуби “Барселона” қишки трансфер ойнасида жамоа таркибини кучайтиришни режалаштирмоқда. Испания матбуотидаги маълумотларга кўра, жамоа раҳбарияти “Наполи” марказий ярим ҳимоячиси Скотт Мактоминей билан шартнома имзолашни кўриб чиқмоқда, деб хабар берди championat.com.
Маълум қилинишича, “Барселона”нинг бу қарорини асословчи омиллардан бири жамоа ўрта чизиғидаги жароҳатлар бўлиб туришидир. Ҳозирги пайтда Френки Де Йонг ва Педри каби етакчи футболчилар жароҳати туфайли узоқ муддатга сафдан чиққан. Шу боис мураббийлар штаби хавфсизлик чораси сифатида тажрибали ва жанговор ярим ҳимоячини таркибга қўшиш ниятида.
Скотт Мактоминей бу мавсум “Наполи” сафида юқори даражада ўйин кўрсатмоқда. Шотландиялик футболчи нафақат жамоанинг ўйин марказида етакчига айланган, балки унинг гўё “мотор”ига айланиб улгурган. Унинг ҳаракатлари, ҳужумдаги қатъиятлилиги ва жамоавий ўйиндаги фаоллиги Европадаги кўплаб клубларнинг диққатини тортди.
Италия клуби эса ўз етакчисини осонгина қўйиб юбориш ниятида эмас. “Наполи” раҳбарияти Мактоминей учун камида 90 миллион евро талаб қилмоқда. Бу эса “Барселона” учун жиддий молиявий қарор бўлиши мумкин. Шу билан бирга, “Тоттенхэм” ва “Ньюкасл” ҳам футболчи хизматларига қизиқиш билдиргани маълум.
Эслатиб ўтамиз, шотландиялик ярим ҳимоячи 2024 йилнинг ёзида “Манчестер Юнайтед”дан “Наполи”га 21 миллион фунт эвазига кўчиб ўтганди. У жамоага тез мослашиб, ўтган мавсумда 39 та учрашувда майдонга тушди, 13 та гол урди ва 6 та голли пас берди.
Унинг ушбу натижалари “А Серия” экспертлари томонидан юқори баҳоланди. Мактоминей ўтган мавсум Италия чемпионатида “Энг яхши футболчи” номига сазовор бўлди. Бу эса унинг трансфер баҳосини янада оширди.
“Барселона”да эса марказий чизиққа кучли рақобат лозим. Мутахассислар фикрича, Мактоминейнинг жисмоний тайёргарлиги ва ўйин интизоми Каталония клубининг услубига мос келиши мумкин. Агар келишув амалга ошса, у “блауграна”нинг жамоавий балансини мустаҳкамлайди ва хусусан, жароҳатлар оқибатларини юмшатишга ёрдам беради.
Ҳозирча расмий музокаралар ҳақида маълумот берилмаган, аммо “Барселона”нинг трансфер сиёсатида Мактоминей исми жиддий номзодлар рўйхатида экани айтилмоқда. Шу тариқа, шотландиялик футболчи келаси ойларда Европа трансфер бозорининг энг қизиқ мавзуларидан бирига айланиши эҳтимолдан холи эмас.
“Zamin”ни Telegram'да ўқинг!
